खोज

बुटवल, २ भदौ । बुटवलमा प्रादेशिक मिडिया सम्मेलन भएको छ । सम्मेलनको प्रदेशका मुख्यमन्त्री डिल्ली बहादुर चौधरीले शुभारम्भ गरे । प्रकाशन तथा प्रशारण संघ लुम्बिनी प्रदेश समितिको आयोजनामा बुटवलमा भएको कार्यक्रममा लुम्बिनी प्रदेशका मुख्यमन्त्री डिल्लीबहादुर चौधरीले सरकारको आलोचना गरेर लेख्न सञ्चारमाध्यम र पत्रकारहरूलाई आग्रह गरेका छन् ।

मुख्यमन्त्री चौधरीले सकारात्मक आलोचनाले मात्रै सरकारलाई सही मार्गदर्शन गरी गल्ती कमजोरी सच्याउन मौका मिल्ने बताए । उनले राजनीतिक परिवर्तनमा मिडियाहरूको ठूलो योगदान रहेको स्मरण गर्दै मिडियाहरू बलियो भए मात्र सरकार बलियो हुने बताए । ‘मिडिया कमजोर हुँदा सरकार पनि कमजोर हुन्छ, तसर्थ मिडियाहरू बलियो हुनुपर्छ भन्ने प्रदेश सरकारको मान्यता छ’– मुख्यमन्त्री चौधरीले भने–‘मिडियाहरूले सरकारको गुणगान गाउनु पर्दैन,आलोचनात्मक लेख्नुस् तर कसैलाई सिध्याउने गरी मिडिया लाग्नुहँदैन ।’

मिडियाको सबलीकरणमा प्रदेश सरकार साथमा रहेको भन्दै उनले सरकारको प्राथमिकता विकास र समृद्धि भएकाले त्यसमा साथ दिन उनले सञ्चारमाध्यमलाई आग्रह गरे । प्रदेश सरकारले वर्षमा २ लाख जनालाई रोजगारी दिने लक्ष्य रहेको र प्रदेशभरि त्यसको संभावना रहेको उनले दाबी गरे । ‘हामीसँग बुद्ध जन्मस्थल लुम्बिनी, स्वर्गद्वारी, आदिवासी जनजातिका संस्कृतिहरू र प्रशस्त हिल स्टेशनहरू छन’–चौधरीले भने–‘प्रदेशको समृद्धि र लगानीका लागि सरकारले अन्तर्राष्ट्रियस्तरमा पनि छलफल गरिरहेको छ ।’
व्यक्तिगतरूपमा अनुदान माग्न नआउन आग्रह गर्दै मुख्यमन्त्री चौधरीले सञ्चार संस्थालाई संस्थागतरूपमा मात्रै अनुदान रकम दिने सरकारको नीति रहेको स्पष्ट पारे ।

सम्मेलनमा प्रेस काउन्सीलका अध्यक्ष बालकृष्ण बस्नेतले मिडिया बाँचे भने मात्रै सरकार समेत बाँच्ने भएको कारण मिडियालाई हेर्ने दृष्टिकोणमा सरकारले सकारात्मक परिवर्तन ल्याउनुपर्ने बताएका थिए ।

अग्रज पत्रकारहरू कनकमणि दीक्षित, युवराज घिमिरे, डा. बालकृष्ण चापागाई लगायतले सञ्चार माध्यमहरूले बहुआयामिक चुनौतिहरूको सामना गरिरहेको उल्लेख गरे । मिडियामा पछिल्लो समयमा आर्थिक मन्दीको असर परेको भन्दै उनीहरूले संकटमा रहेका मिडिया जोगाउने दायित्व संघ, प्रदेश र स्थानीय सरकारको रहेको कुरामा जोड दिएका थिए ।

सम्मेलनमा प्रदेशभरका छापा, विद्युतीय र अनलाइन गरी करिब दुई सय जना सञ्चार उद्यमी र पत्रकारहरूको सहभागिता रहेको छ । सम्मेलनले मोफसलका मिडियाहरूको सबलीकरण,पत्रकारहरूको रोजगारीको सुरक्षा, विज्ञापन दररेटमा एकरूपता लगायतका विषयमा बसन्तपुर घोषणापत्र जारी गर्ने प्रकाशन तथा प्रशारण संघ लुम्बिनीका अध्यक्ष नवराज कुँवरले जानकारी दिए ।