खोज

दाङ, १ भदौ ।

दाङमा डेंगुुका बिरामीको संख्या बढ्दै गएको छ् । जिल्लामा अहिलेसम्म ९१ जनामा डेंगु सङ्क्रमण पुष्टि भएको स्वास्थ्य कार्यालय दाङले जनाएको छ । तथ्यांक अनुसार, तुलसीपुर उपमहानगरपालिकामा २९, लमही नगरपालिकामा २३, घोराही उपमहानगरपालिकामा १४, गढवा गाउँपालिकामा १३ र राप्ती गाउँपालिकामा १२ जना गरी ९१ जनामा डेंगु सङ्क्रमण पुष्टि भएको स्वास्थ्य कार्यालय दाङका फोकल पर्सन कमल चन्दले जानकारी दिए ।

पालिकाहरूले दिएको विवरण अनुसार सबै उमेरका महिला, बालबालिका र पुरुषमा डेंगु सङ्क्रमण भएको चन्दले बताए । हालसम्म डेंगु सङ्क्रमणबाट कसैको मृत्यु भने भएको छैन । गत वर्ष जिल्लामा २ जनाको डेंगुका कारण मृत्यु भएको थियो । ज्यान गुमाउनेमा एक जना घोराहीका र अर्का दंगीशरणका थिए । जिल्लामा डेंगु रोगको जोखिम बढ्दै गएका बेलामा यसको नियन्त्रणका लागि पालिकाहरुमा दिनदिनै सचेतनाका कार्यक्रम भइरहेका छन् ।

डेंगु रोगले देशैभर महामारी लिन थालेपछि जिल्लाका सबै स्थानीय तहले रोग रोकथाम तथा नियन्त्रण गर्न विभिन्न प्रयास गरेका छन् । साथै पालिकाले सरोकारवालासँग छलफल समेत गरेका छन् । पालिकाहरूले रोगबाट जोगिन चेतनामूलक कार्यक्रमसँगै लामखुटे बस्ने वासस्थान र लार्भा नष्ट गर्ने अभियान नै चलाएका छन् ।

डेंगु नियन्त्रण तथा रोकथामका लागि लामखुट्टेले अण्डा पार्न सक्ने सम्भावित घर, विद्यालयभित्र र वरपरका पानी जम्ने सबै ठाउँहरू र पानी राख्ने भाँडाहरू खोजी खोजी सफा गरौँ र लामखुट्टेको फुलनष्ट गरौँ भन्ने जस्ता नारासहित अभियान नै चलाएका छन् । संक्रमण भएमा प्रसस्त पानी पिउन, झोलिलो तथा पोसिलो खानेकुरा प्रशस्त मात्रामा खान, पूर्णरूपमा आराम गर्न चिकित्सकको सुझाव छ । डेंगुका जटिल लक्षण देखिएमा तुरुन्त स्वास्थ्य संस्था लैजान चिकित्सकको सुझाव छ ।