खोज

सल्यान, ३१ साउन । धार्मिक पर्यटनको महत्वपूर्ण स्थल सल्यान कालिमाटीको गंगामाला भगवति मन्दिरको सरसफाई गरिएको छ । श्रावण महिनाभर बन्द रहने यो मन्दिर शुक्रबार (भदौ १ गते) देखि खुल्दै छ । त्यस अघि मन्दिर परिसर र मन्दिर सम्म पुग्ने सिढीको सरसफाई गरिएको मन्दिर व्यवस्थापन समितिका निवर्तमान सचिव सशिराम वलीले जानकारी दिए । कालिमाटी गाउँपालिका वडा नम्बर ३ मा अवस्थित गंगामाला भगवति मन्दिरमा देशका विभिन्न स्थानबाट सयौँ मानिसले दर्शन, अवलोकन र पुजाअर्चना गर्दछन् ।

विहिबार मन्दिर व्यवस्थापन समितिको अगुवाईमा ३ नम्बर वडाका जनप्रतिनिधी, इलाका प्रहरी कार्यालय कालिमाटीका प्रतिनिधी तथा स्थानीयहरुले सरसफाई गरेको वलीले जनाए । पवित्र धार्मिक स्थललाई सफा, सुन्दर बनाउनका लागि रामपुर बजार देखि मन्दिर परिसर सम्मको सिढी र मन्दिर वरिपरी विहान ७ बजेदेखी करिव ९:३० सम्म सरसफाई गरिएको थियो । वडा अध्यक्ष शिव बहादुर खत्री, इप्रका कालिमाटीका प्रहरी सहायक निरिक्षक अक्ष्मण अधिकारी, मन्दिर व्यवस्थापन समितिका अध्यक्ष थमन बहादुर खत्री लगाएत प्रहरी, स्थानीय व्यापारि सरसफाइमा सहभागि भएका थिए ।

मन्दिरका पुजारी टोप बहादुर राजीका अनुसार गंगामालाको दर्शन, अवलोकनका लागि कैलाली कञ्चनपु, बाँके, बर्दिया, दांग, प्युठान लगाएत देशका विभिन्न जिल्लाबाट मानिसहरु आउने गरेका छन् । मन्दिरमा पुजाअर्चना संगै बोका, पाठी र कुखुराको बली पनि चढाइन्छ ।

मन्दिरमा वर्षभरी करिव चार हजार बढी बोका, पाठीको बलि चढ्ने गरेको छ । बलि चढाएका टाउका विक्रिबाट र दानपेटीकामा खसेको दान रकम गरेर मन्दिरले वार्षिक १२ देखि १४ लाख रुपैयाँ सम्म आम्दानी गर्नेगरेको समितिका निवर्तमान सचिव वलीले जानकारी दिए । मन्दिरमा पुजा अर्चनाको क्रममा चढाएको भेटी वापतको रकम भने पुजारीले नै लग्नेगरेका छन् ।

कालिमाटी गंगामाला भगवति मन्दिरमा हरेक वर्षको मंशिर महिनामा ठूलो मेला लाग्ने गर्दछ । धान्य पूर्णिमाको अवसरमा त्यस क्षेत्रमा परम्परादेखी मेला लाग्ने गरेको छ । यो मन्दिर हरेक वर्षको साउन महिनामा बन्द रहन्छ । स्थानीय बुढापाकाका अनुसार साउन महिनामा गंगामाला भगवती रजस्वला हुने भएकाले यो महिनामा मन्दिर बन्द रहन्छ ।

कालिमाटी गाउँपालिकामा गंगामाला भगवती मन्दिर संगै त्रिकोटेश्वर मन्दिर, कछुवा दह, शिव मन्दिर, सिम्ले लहरा, चमेरे गुफा लगाएतका पर्यटकीय एवम् धार्मीक स्थल छन् । पालिका भित्रका धार्मिक एवम् पर्यटकीय स्थलको संरक्षण, विकास, प्रचारप्रसारका लागि गाउँपालिका आफै र प्रदेश, केन्द्र सरकार तथा विभिन्न निकायसंग समन्वय भइरहेको कालिमाटी गाउँपालिका अध्यक्ष दान बहादुर केसीले जानकारी दिए ।