खोज

चन्द्रौटा(कपिलवस्तु), ३२ साउन ।

कपिलवस्तुकाे शिवराज नगरपालिका वडा ३ ले गाउँमै पुगेर आँखा शिविर सञ्चालन गरेको छ । आँखा पाक्ने रोगको जोखिम बढसँगै गाउँघरमै शिविर सञ्चालन गरिएकाे हाे । वडाकाे खरेन्द्रपुर, मदवा र बलुहवा गाउँमा पुगेर नि:शुल्क शिविर सञ्चालन गरिएको जनाइएको छ ।

वडा नम्बर ३ मा भएकाे नि:शुल्क शिविरबाट एक हजार ५९१ जनाले सेवा लिएकाे जनाइएको छ । जसमध्ये ८९ जना मोतियाविन्दुका बिरामी फेला परेकाे चनई स्वास्थ्य चाैकीका प्रमुख जितेन्द्र बि.सी.ले जनाए । बिरामीहरुलाई नि:शुल्क अप्रेसनको लागि बहादुरगंज अस्पतालका लागि सिफारिस गरिएको बि.सी.काे भनाई छ । वडा अध्यक्ष टेकलाल सापकोटाले वडाबासीलाई आँखाको रोगबाट बचाउन निःशुल्क शिविर सञ्चालन गरेको बताए । सापकोटाकै नेतृत्वमा वडा र स्वास्थ्य चाैकीकाे संयुक्त आयाेजनामा वडाका विभिन्न गाउँमा पुगेर नागरिकहरुका आँखा जाँच शिविर गरिएको उनकाे दावी गरे ।

‘आम नागरिकलाई पायक पर्ने गरी आँखा शिविर सञ्चालन गरिएको छ । सापकोटाले भने : ‘अहिले महामारीको रूपमा आँखा पाक्ने रोग रहेकोले शिविर आयोजना गरिएको हो ।’ बिहीबार बलुहवामा आयोजित शिविरमा आँखा जाँच गर्ने नागरिकहरूको भिड लाग्यो थियाे । आँखा दुख्ने, आँखा पाक्ने, मोतियाबिन्दुको समस्या लगायतका बिरामीहरुले शिविरबाट लाभ लिएका स्थानीय बसन्त थारुले बताए । छन्द (कालेबाबु) नारायणी आँखा अस्पताल बहादुरगंजको स्वास्थ्यकर्मीको टोलीले आँखा जाँच गरिएकाे चनई स्वास्थ्य चाैकी प्रमुख जितेन्द्र बिसीले जनाए ।

वडा कार्यालयले महामारीको समयमा नागरिकहरुको लागि शिविर सञ्चालन गरेको प्रति थारुले प्रशंसा व्यक्त गरे । बहादुरगंज आँखा अस्पतालका प्रशासकीय अधिकृत जसराज विश्वकर्माले शिविरमा प्रभावकारी भएकाे जानकारी दिए । खरेन्द्रपुरमा भएको शिविरमा ७ सय ४९ जनाको आँखा जाँच गरिएको छ । त्यस्तै मदवामा भएको नि:शुल्क आँखा शिविरमा ३ सय ९० जनाले र बिहीबार भएकाे बलुहवा गाउँमा ४ सय ५२ जनाले जाँच सेवा लिएका थिए ।