खोज

बुटवल, ३१ साउन ।

बुटवल लेडी जेसीजले आयोजना गरेको जेसीज सप्ताह अन्तर्गत चौथो दिन मानव सेवा आश्रम बुटवलमा रहेका व्यक्तिहरूको दाँत, मुख तथा गिजा सम्बन्धी निःशुल्क स्वास्थ्य शिविर सञ्चालन गरेको छ ।

बुटवल ८ सुख्खानगरमा रहेको आश्रममा स्वास्थ्यकर्मी सहितको टोलीले आश्रितहरूको दाँत, मुख तथा गिजाको अवस्था जाँच गरी औषधि समेत वितरण गरिएको कार्यक्रम संयोजक लक्ष्मी पौडेलले जानकारी दिइन् ।

कार्यक्रममा बोल्दै मानव सेवा आश्रम बुटवलका अभिभावक तथा वरिष्ठ सल्लाहकार लोकनाथ भुसालले मानवता प्रवद्र्धनको काम मानव सेवा आश्रमले गर्दै आएको बताउँदै सडक मानवमुक्त अभियान सञ्चालन गर्दै आएको बताए ।

उनले आश्रममा २ सय जनाले सेवा लिइरहेको बताउँदै आश्रमको दैनिक ५० हजार खर्च रहेको भएपनि समाज सहयोगीहरुको सहयोगले सहज भएको बताए । उनले जेसीज र मानव सेवा आश्रमको नाम काम र लोगो एउटै रहेको बताए ।

ओम शान्ति डेन्टल हेल्थ केयर प्रालिका सञ्चालक डा सन्दीप पौडेल र डेन्टल असिस्टेन्ट निशा दर्लामीको टोलीले परीक्षण एव औषधि वितरण गरेका थिए ।

कार्यक्रममा बुटवल लेडि जेसिजका पूर्व अध्यक्ष एव सल्लाहकार राधिका पोखरेल, अध्यक्ष कमला लम्साल, कार्यकारिणी उपाध्यक्ष वसन्ता घिमिरे, महासचिव रुपा श्रेष्ठ पाठक, सह कोषाध्यक्ष कविता श्रेष्ठ लगायतले बोलेका थिए ।

आइतबारदेखि सुरु भएको जेसिज सप्ताह भदौ २ गते सञ्चालन हुने बुटवल लेडि जेसिज अध्यक्ष कमला लम्सालले जानकारी दिइन् ।

उनका अनुसार बिहीबार साउन ३२ गते वित्तीय साक्षरता कार्यक्रम, भदौ १ गते प्रदेश राजधानी स्थानान्तरण सँगै बुटवल क्षेत्रमा देखिएको सुस्त आर्थिक गतिविधि, वर्तमान आर्थिक अवस्था र बुटवलमा देखिएका विभिन्न समस्यालाई मध्यनजर गर्दै सरोकारवालाहरूका बिचमा अन्तरक्रिया हुनेछ ।

यस्तै जेसिज सप्ताहको अन्तिम दिन भदौ २ गते पुरस्कार वितरण तथा समापन समारोह रहेको जेसिज सप्ताहका मूल संयोजक रुपा श्रेष्ठले जानकारी दिइन् ।