खोज

सल्यान, ३१ साउन ।

आँखा पाक्ने समस्या फैलिदै गएपछि सल्यानमा आँखा उपचार केन्द्रमा विरामीको चाप बढ्दै गएको छ भने केही विद्यालयहरु बन्द भएका छन् । जिल्लामा पछिल्लो समय आँखा पाक्ने रोग फैलिएको शितलपाटी आँखा अस्पतालले जनाएको छ । पहिले ४० देखि ४५ जनासम्म आँखाका विरामी आउने गरेकोमा हिजोआज एक सय ५० सम्म पुग्ने गरेको शिलतपाटी आँखा उपचार केन्द्रकी इन्चार्ज नवीना चौधरीले बताइन् ।

यस्तै आँखा पाक्ने रोग तीव्र गतिमा फैलिएको भन्दै सल्यानका केही निजी (संस्थागत) विद्यालयले एक हप्ताका लागि पठनपाठन बन्द गरेका छन् । विद्यार्थीलाई संक्रमित हुनबाट जोगाउन विद्यालय भदौ ३ गतेसम्मका लागि बन्द गरिएको मोर्डन तुल्सी माध्यमिक विद्यालय शितलपार्टीका भाइस प्रिन्सिपल दिपेन्द्र डाँगीले जानकारी दिए । केही विद्यार्थीमा आँखा पाक्ने रोग देखिएको र अन्य विद्यार्थीमा पनि फैलिन सक्ने भएकाले एक हप्ताका लागि विद्यालय बन्द गर्नु परेको उनको भनाई छ । भिडभाडमा यस प्रकारको संक्रमण छिटो फैलिने भएकाले यसको नियन्त्रणका लागि विद्यालय बन्द गर्नु परेको उनले बताए । शारदा नगरपालिकाका मोर्डन तुल्सीसँगै ब्राइट ब्राइट पर्ल र मित्र प्याराडाइज बोर्डिङ स्कुल पनि बन्द भएका छन् ।

आँखा उपचार केन्द्रका अनुसार चिकित्सकीय भाषामा आँखाको सेतो भाग सुन्निने र रातो हुने समस्यालाई ‘एडिनो भाइरल कन्जंग्टिवाइटिस’ भनिन्छ । यस्तो संक्रमण हुँदा आँखा गुलाफी वा रातो देखिने, चिलाउने, पोल्ने, पानी बग्ने, चिप्रा लाग्ने लगायतका लक्षण देखिने इन्चार्ज चौधरीको भनाई छ । बिरामीको परेला सुन्निने, आँखामा केही बिझे जस्तो महसुस हुने, उज्यालो हेर्न गाह्रो हुने, दृष्टि धमिलो हुने लगायतका समस्या पनि देखिने उनले बताइन् ।

‘संक्रमण सामान्यतया ७ देखि १० दिनसम्म रहन्छ । तर कसैकसैमा भने जटिल बनेर आँखाको कोर्नियामा समेत असर गर्न सक्छ’, उनले भनिन्, ‘त्यसैले संक्रमण देखिनासाथ उपचार प्रक्रियामा जानु राम्रो हुन्छ ।’ संक्रमित व्यक्ति वा घरबाहिर गएर फर्केका स्वस्थ व्यक्तिले हात नियमित रूपमा साबुनपानीले धुने, विरामीले प्रयोग गरेका तौलिया, रुमाल, लुगाफाटो, मेकअपका सामान अरूलाई प्रयोग गर्न दिन नहुने उनको सुझाव छ । रोग लागिहाले चिसो पानीले समय समयमा आँखा सफा गर्ने, तातो चिजले नसेकाउने, घरेलु औषधी प्रयोग नगर्न पनि उनले सल्लाह दिएकी छिन् ।