खोज

सुनवल, ३० साउन ।

पश्चिम नवलपरासीमा साढे १२ किलोमिटर हुलाकी सडक निर्माणको काम ७ वर्ष बित्दा पनि पूरा हुन सकेको छैन । २०७३ सालदेखि निर्माण सुरु भएको सदरमुकाम परासीदेखि नारायणचोक जोड्ने उक्त सडक कालोपत्रे गर्ने कार्य हालसम्म पनि परा हुन नसकेको हो । गुणस्तरीय काम नगर्दा निर्माण सम्पन्न नहँुदै सडक पिच गरेको स्थानमा खाल्डाखुल्डी परिसकेको छ । सडक विस्तारको जिम्मा पाएको कञ्चनजङ्गा विरुवा जेभि काठमाण्डौले तीन वर्षदेखि ९० प्रतिशत काम पूरा भएको बताउँदै पटक पटक थप समय माग गरेपनि काम पूरा गरेको छैन ।

चौथो पटक थपिएको म्याद गत वर्षको चैत मसान्तमै सकिएपनि असार मसान्त सम्ममा काम पूरा गर्ने अपेक्षा गरिएपनि काममा प्रगति नदेखिएको हुलाकी राजमार्ग योजना कार्यालय कपिलवस्तुका प्रमुख विष्णुबाबु पाण्डेले बताए । मन्त्रिपरिषदले नयाँ योजनाका सन्दर्भमा बनाएको मापदण्डको आधारमा अब ठेकेदारलाई थप समय उपलब्ध गराउने कि नगराउने भन्ने निर्णय लिईने पाण्डेले जानकारी दिए ।

ठेकेदारले आर्थिक अभाव र निर्माण सामग्रीको अभाव देखाउँदै आएको उनले बताए । फेरि पनि योजना कार्यालयले उक्त ठेकेदारलाई सडक निर्माणको काम सक्न म्याद थपको तयारीमा छ । “ठेक्का तोडेर फेरि आह्वान गर्दा झनै समस्या हुने हो कि भनेर हामी के गर्ने भन्ने निष्र्कषमा पुगेका छैनौ”–पाण्डेले भने । काम नगर्ने ठेकेदारलाई पटक पटक समय उपलब्ध गराउने तर कालो सूचीमा राख्नेदेखि ठेक्का तोड्ने सम्मको काम गर्न सरकारी निकाय ईच्छुक नदेखिएकोप्रति सर्वसाधारण आक्रोशित भएका छन् ।

सडक निर्माण सुरु भएको यतिका वर्ष सम्म पनि सो सडक खण्डमा पर्ने पुल र कल्भर्ट निर्माणको लागि हाल सम्म ठेक्का प्रक्रिया सुरु भएको छैन । उक्त सडक खण्डमा जीर्ण कल्भर्ट भत्काएर तत्काल बनाउने प्रतिवद्धता जनाएपनि हाल सम्म कुनै काम भएको छैन । डाईभर्सनको माध्यमबाट यात्रा हँुदै आएको छ । रामग्राम नगरपालिकाका नगर प्रमुख धनपत यादवले सडक र पुल जीर्ण भएकाले पटकपटक संघीय सरकार अन्तर्गतको हुलाकी राजमार्ग योजना कार्यालयलाई ध्यानाकर्षण गराएपनि सुनुवाई नभएको गुनासो गरे । “हुलाकी राजमार्ग कार्यालयमा पुगेर कमसेकम कल्भर्टमा वैकल्पिक व्यवस्था गरेर सहज यात्राको वातावरण बनाईदिन आग्रह गर्दा समेत कार्यालयले सुनवाई गरेन”– नगर प्रमुख यादवले भने, “संघीय सरकारको काममा भएको ढिलाईले जनताले हामीलाई गाली गरिरहेका छन् ।”

ठेकेदारको लापरवाहीका कारण जिल्लामा तीन खण्डमा विभाजन गरेर हुलाकी सडक विस्तारको काम भईरहे पनि सबै खण्डको काम सुस्त छ । अर्को खण्ड नारायणचोक देखि त्रिवेणी जोड्ने १६ किलोमिटर सडकको अवस्था पनि उस्तै छ । यही मंसिर सम्म काम सक्नुपर्नेमा निर्माण कम्पनी बज्र महालक्ष्मी जेभिले हाल सम्म आधा काम काम सकेको छ । आगामी मंसिर मसान्त सम्म काम सक्नुपर्ने हुलाकी सडक अन्तर्गतकै ९ किलोमिटर लामो प्रतापपुर–कठहवा जोड्ने सडक विस्तारमा पनि उस्तै ढिलासुस्ती छ ।

सडकको जीर्ण अवस्थाले अहिले यात्रा गर्न सक्ने अवस्था छैन । जसका कारण सर्वसाधारण आक्रोशित भएका छन् । “काम नसके पनि सडकका खाल्डाखुल्डी त पुरिदेउ न भनी पटक पटक ठेकेदारलाई हारगुहार गर्दा समेत ठेकेदारले सुनेको नसुन्यै गर्छ”–प्रतापपुर गाउँपालिकाका अध्यक्ष उमेशचन्द्र यादवले भने । सरावल निवासी सुशान्त घिमिरेले सडकको दुरावस्था हुँदा समेत यस क्षेत्रका जनप्रतिनिधि मौन बसेकोप्रति असन्तुष्टि व्यक्त गरे ।

“दैनिक मोटरसाईकलमा यात्रा गर्नेको यो सडक खण्डमा के हालत भएको छ, कसले बुभ्mने ? जनताले कसलाई भन्ने ?” उनले गुनासो गरे । हुलाकी राजमार्ग योजना कार्यालय कपिलवस्तु अन्तर्गत परासी–नारायणचोक, नारायणचोक–त्रिवेणी, बेलाटारी–कठहवा गरी तीन ओटा खण्ड कुल ९३ करोडको लागतमा विस्तारको काम भइरहेको हो । एकातर्फ धेरै काम ओगट्ने र अर्कोतर्फ निकै कम मूल्यमा ठेक्का कबोल गर्दा ठेकेदारले योजना अलपत्र पार्न थालेको स्वयम् हुलाकी राजमार्ग कार्यालयका ईन्जिनियरहरुको भनाई छ । अहिले बाँकी दुई खण्डमा पनि सडक विस्तारको काममा ढिलोसुस्तीले वर्षायाममा हिलोका कारण हिड्न नसकिने अवस्था छ ।