खोज

दाङ, ३० साउन ।

प्रसिद्ध धार्मिकस्थल पाण्डवेश्वर महादेव मन्दिर धारापानीमा यही साउन २ गते सुरु भएको पुरुषोत्तम माहात्म्य प्रवचन एवम् शृङ्गारिक गंगा आरती बोलबम महोत्सवमा मंगलबार एक करोड बत्ती बालिंदै छ ।

महोत्सवा शृङ्गारिक गंगा आरती हेर्ने भक्तजन तथा दर्शनार्थीहरुको बाक्लै घुइँचो लाग्ने गरेको छ । आज १ करोड बत्ति बाल्ने कार्यक्रम रहेको मन्दिर व्यवस्थापन समितिले जनाएको छ । दाताहरुको दानबाट संकलन भएको बत्ती बाल्ने मन्दिर व्यवस्थापन समितिले जनाएको हो । आफ्ना पितृहरुको मोक्षको कामना गर्दै दाताहरुले दान गरेको एक करोड बत्ती संकलन भएको छ । मंगलबार बेलुका ५ वजे बत्ती बाल्ने तयारी गरेको समितिले जनाएको छ ।

मन्दिरको प्रचारप्रसार तथा धर्म र धार्मिक आस्थामा थप सुदृढ बनाउने उद्देश्यले पुरुषोत्तम महात्म्य एवम् शृङ्गारिक आरती बोलबम मासिक महामहोत्सव सञ्चालन गरेको महामहोत्सव मूल व्यवस्थापन समितिका संयोजक गणेशकुमार अधिकारीले जानकारी दिए । मलमासको समयमा मात्र सञ्चालन गर्न मिल्ने महामहोत्सव पाण्डवेश्वर महादेव मन्दिर धारापानीमा यसवर्ष पहिलो पटक सञ्चालन भएको हो । साउन २ गतेदेखि मन्दिरमा साँझ नियमित रूपमा शृङ्गारिक गंगा आरती, मण्डव पूजा तथा हवन सञ्चालन, पुरुषोत्तम माहात्म्य पाठलगायतका कार्य भइरहेको मन्दिर व्यवस्थापन समितिका अध्यक्ष तथा महामहोत्सव मूल व्यवस्थापन समितिका संयोजक अधिकारी बताए ।

उनले भने, “मलमासको समयमा मात्रै सञ्चालन हुने भएकाले धारापानी धाममा महामहोत्सवको आयोजना गरेका हौं ।” महामहोत्सवमा अन्तर्राष्ट्रिय स्वर्णपदक विभूषित पण्डित अमृतशरण देवाचार्यले पुरुषोत्तम माहात्म्य प्रवचन दिइरहेका छन् । प्रवचन सुन्न दाङ लगायत छिमेकी जिल्ला बाँके, प्युठान र भारतबाट पनि भक्तजन आएको उनले बताए । वाराणसी समूहले प्रत्येक दिन बेलुकी वैदिक शृङ्गारिक गङ्गा आरती गर्ने गरेको संयोजक अधिकारीले बताए । उनका अनुसार महामहोत्सव अवधिभर मण्डव पूजा तथा हवन सञ्चालन, पुरुषोत्तम माहात्म्य पाठ पारायण, सङ्गीतमय लीलामय पुरुषोत्तम माहात्म्य प्रवचन, पुरुषोत्तम एवम् बोलबम महाआरती र सङ्गीतमय लीलामय प्रवचन तथा भजन सञ्चालन भएको छ ।

भारतको प्रसिद्ध धार्मिकस्थल हरिद्वारबाट दुई जना र बनारसबाट एक जना गरेर तीन जना पण्डितले दैनिक आरती गर्ने गरेको धारापानी मन्दिर व्यवस्थापन समितिका सचिव विष्णुराम आचार्यले बताए । उनका अनुसार आरतीमा धुप, घिउ, कपुर, मयुरपङ्ख, ल्वाङदानी, सेतोचमर, अलैँचीदाना र फूलपातीलगायतका विभिन्न सुगन्धित वस्तुको प्रयोग गरिन्छ । शङ्ख ध्वनीबाट शुभारम्भ हुने आरती समापनपछि भजन गाएर भक्तजनलाई नचाएर मनोरन्जन दिने गरिएको छ । भक्तजनको साथ र सहयोगले नै निरन्तरता दिन सकेको उनले बताए । धारापानीमा आउने पर्यटकका लागि आकर्षक थपिएको छ, सन्ध्या आरती । मनोरम दृश्यावलोकनबाट भ्रमणको शुभारम्भ गरेका पर्यटकहरु मठमन्दिर, विश्वको अग्लो त्रिशुल, एक सय आठ गौमुखी धारा, ओमकार पोखरी र अन्य मठ मन्दिर अवलोकनपश्चात साँझ भने सन्ध्याआरतीमा सहभागी हुने गरेका छन् । दाताहरुको सहयोगबाट चलेको मन्दिरलाई दाताकै साथ सहयोग चाहिने व्यवस्थापन समितिले जनाएको छ ।