खोज

नवलपुर, २७ साउन ।

पुर्वी नवलपरासीको नवलपुरमा पछिल्लो केही दिन यता बालबालिकादेखि वृद्धवृद्धामा आँखा पाक्ने रोग व्यापक फैलिएको छ ।

जिल्लाका सबै सरकारी अस्पतालमा दैनिक पाँच सय आँखा पाक्ने बिरामी आउने गरेको रयो रोग व्यापक रूपमा फैलिएपछि सचेत रहन जिल्ला स्वास्थ्य कार्यालयले अनुरोध गरेको छ ।

डेंगुले आक्रान्त पारेका बेला आँखाको भाइरल कन्जक्टिभाइटिस रोगका कारण आँखा पाक्ने रोग व्यापक रुपमा फैलिनुका साथै सरकारी अस्पतालमा मात्र दैनिक पाँच सय आँखाका बिरामी आउने गरेको तर निजी अस्पतालको त तथ्याङ्क यकिन नै नगरिएको जिल्ला स्वास्थ्य कार्यालय नवलपुरका प्रमुख केशव चापागाईंले बताए ।

अस्पताल आउनेलाई बिरामीको अवस्था हेरेर आँखामा हाल्ने औषधि सहित सरसफाइमा ध्यान दिनेबारे सल्लाह दिने गरेको र यो रोगले साना उमेरका बालबालिकामा अझै बढी समस्या देखिएकोले आँखाका बिरामीले सामान्य चेकजाँच गरी घरमा नै बसेर उपचार गर्न सकिने हुँदा सक्रमितका बिरामी बढी भिडभाडमा नजानका लागि मध्यविन्दु जिल्ला अस्पतालका डा. कमलराज न्यौपानेले अनुरोध समेत गरेका छन् ।

केही दिनदेखि फैलिएको यस समस्याले विद्यालयका विद्यार्थीहरुलाई समेत प्रत्यक्ष रुपमा प्रभाव पारेको छ । अहिले विद्यालयमा अध्यननरत अधिकांश बालबालिकामा आँखा पाक्ने समस्या देखिएको र विद्यार्थीको पढाईलाई समेत असर पुर्याएकोे छ । नवलपुर जिल्लाका सबै पालिकाको विद्यालय गत मंगलबारदेखि नै बन्द भएको छ ।

त्यसैगरी नवलपुरमा डेंगुका बिरामीको संख्या २९ पुगेको छ । जिल्लामा साउन महिनाको २५ गते सम्म डेंगुबाट संक्रमित हुनेको संख्या १२ जना महिला र १७ जना पुरुष गरेर २९ पुगेको जिल्ला स्वास्थ्य कार्यालय नवलपुरका प्रमुख केशब चापागाईंले जानकारी दिए ।

जिल्लामा सबै भन्दा धेरै डेंगुका बिरामी मध्यविन्दु नगरपालिकामा फेला परेका छ्न् । मध्यविन्दुमा ५ जना महिला र ८ जना पुरुष गरेर १३ जना डेंगुका बिरामी रहेको उनले बताए । त्यसैगरी कावासोतीमा ३ महिला र ४ पुरुष सहित ७ जना, देवचुलीमा ३ महिला र २ पुरुष सहित ५ जना, गैंडाकोटमा १ महिला र २ पुरुष सहित ३ जना र विनयी त्रिवेणीमा १ महिला र १ पुरुष गरेर २ जना डेंगुका बिरामी फेला परेका हुन् ।

स्वास्थ्य कार्यालयले दिएको जानकारी अनुसार आर्थिक वर्ष ७९÷८० मा नवलपुरमा १ सय ५९ महिला र २ सय १५ पुरुष गरेर कुल ३ सय ७४ जना डेंगुका बिरामी फेला परेका थिए ।