खोज

बुटवल, २६ साउन ।  बुटवल–बेलहिया सिक्स लेन सडक निर्माण सुरु भएको ९ बर्ष बित्दा समेत अझै निर्माणाधीन अवस्थामा छ । सडक हस्तान्तरण नहँुदै कतिपय स्थानमा भत्किएर पुनः टालटुल समेत गरिएको छ । सवारी साधन दुर्घटनाबाट भत्किएका डिभाईडर र रेलिङ्ग समयमा नै मर्मत नहुँदा यसले सडकको सौन्दर्यलाई थप गिज्जाईरहेको छ ।

सडक किनारका रेलिड्डहरू भने ठाउँ ठाउँमा कतै भाँचिएका छन कतै रेलिड्डमा लगाईएका पाईपहरू समेत हराएका छन । सडकको दुरावस्थाले सुन्दर बुटवल भैरहवा सडक कुरूप देखिन थालेको स्थानीयले गुनासो गरेका छन् । यसरी सरकारी सम्पत्तीको नास हँुदा समेत सम्बन्धित कार्यालयले मर्मतमा कुनै चासो नदिएको उनीहरूको भनाइ छ । बुटवल भैरहवा क्षेत्रमा करिब १ दर्जन बढी ठाउँमा गाडीको ठक्करबाट रेलिड्ड, पिल्लर भाँचिएका छन् भने धेरै ठाउँमा आफूखुसी पाईप निकालेर बाटो समेत बनाएका छन् । मुख्य राजमार्गमा यसरी आफूखुसी सडक खोल्दा कुनै बेला ठूलो दुर्घटना निम्तिन सक्ने भन्दै समयमा सम्बन्धित कार्यालय रोकथाम गर्न लाग्नुपर्ने स्थानीयको माग रहेको छ ।

एक स्थानीय भन्छन्–‘ भलवाडी देखि भैरहवा सम्म धेरै ठाउँमा सडक दायाँ बायाँका रेलिड्डहरू सवारी दुर्घटनाका कारण भाँचीएको र छरपष्ट भएको महिनौ भयो सवारी दुर्घटनाले क्षति पुगेको छ तर सम्बन्धित सवारी वा कार्यालय कसैले मर्मत गर्नेतर्फ ध्यान दिएको पाइँदैन ।’ सडक डिभिजन कार्यालय बुटबलका प्रमुख होम बहादुर ए.सी.ले गत बर्ष केही मर्मत गरेको र यसपाली समेत मर्मत गर्ने योजना रहेको बताए । धेरै महिनादेखि सडक किनारका रेलिड्डहरू भाँचिएका कारण सडक अस्तब्यस्त भएको भन्ने प्रश्नमा प्रमुख एसीले भने –‘जसले दुर्घटना गराएर क्षति पुराएको हो, उसैले बनाउनु पर्ने हुन्छ तर कतीपय अवस्थामा दुर्घटना गराएको सवारीले कार्यालयमा निर्माण गर्ने भनेर धरौटी राखेको हुन्छ तर समयमा नबनाएका कारण ढिला भएको हुन सक्छ ।’

धेरै ठाउँमा भत्कीएका धेरै समय हुँदा समेत निर्माण नहुँदा सडक डिभीजन कार्यालय र दुर्घटना गराउने सवारी बीच मिलेमतो भएकाले समयमा निर्माण नभएको गुनासो समेत हुन थालेको छ । दुर्घटना गराउने सवारीलाई नजीकको प्रहरी कार्यालयले नियन्त्रणमा लिएर सडकको क्षति यकिन गरेर निर्माण गरीदिने सर्त र सडक डिभीजनको सहमतीमा मात्र गाडी छाड्ने गरेको प्रहरीहरू बताउँछन । यसरी क्षति भएका ठाउँहरू समयमा निर्माण नगर्नु सडक डिभीजन कार्यालयको लापरवाही भएको आरोप लाग्ने गरेको छ ।