खोज

भैरहवा, २५ साउन ।

रुपन्देहीको सिद्धार्थनगर नगरपालिकाको १४ औँ विशेष नगर सभा नेकपा एमालेका नगर सभा सदस्यहरुले बहिस्कार गरेका छन् ।

एकीकृत सम्पत्ति करमा १० प्रतिशत भन्दा बढी वृद्धि गर्न नहुने एमाले सदस्यहरुको सुझावलाई लत्याएको भन्दै नेकपा एमालेका नगर सदस्यहरुको विरोधका बाबजुद पारित गर्न थालेपछि नगर सभा बहिस्कार गरेको सिद्धार्थनगर नगरपालिका वडा नं ८ का वडा सदस्य तथा नगर सभा सदस्य प्रकाश पाण्डेले बताए ।

“एकैपटक एकीकृत सम्पत्ति कर बढाउँदा जनतालाई समस्या हुन्छ बिस्तारै बढाउँ भन्दा बहुमतको आधारमा २० प्रतिशतसम्म बढाउने निर्णय हुन थालेपछि एमालेका २६ जना नगर सभा सदस्यहरुले बहिस्कार गरेका छौं”–सदस्य पाण्डेले भने ।

वडा नं. ९ का वडा सदस्य वसन्तप्रसाद भट्टराईले एकीकृत सम्पत्ति कर बढाएको विषयमा जनताको ब्यापक गुनासो आएपछि सम्बोधन गरौँ भन्ने प्रस्ताव पेश गरेकोमा उक्त प्रस्तावमा पनि कुनै किसिमको हेरफेर नहुने जानकारी प्राप्त भएको हुँदा विशेष नगर सभाको औचित्य नरहेको भन्दै बहीस्कार गरिएको बताए ।

वडा नं. ८ का वडा सदस्य हरि प्रसाद आचार्यले कार्यपालिकाको निर्णय भयो त्यही नै नगर सभा सदस्यले पारित गर्नुपर्ने भए नगर सदस्यको आवाज सुनुवाई नहुने भए नगरसभा के का लागि बोलाएको भनी नगर सभा बहिस्कार गरिएको बताए ।

सिद्धार्थनगर नगरपालिकाले एकीकृत सम्पत्ति कर बढाउँदा चौतर्फी आलोचना भएपछि बिहीबार विशेष नगर सभा राखेको थियो ।