खोज

बुटवल, २५ साउन ।

बुटवल उउपमहानगरपालिकाकी उपप्रमुख सावित्रादेवी अर्यालले आदिवासी जनजातीका हक अधिकार सुनिश्चित गर्न उपमहानगर प्रतिवद्ध रहेको बताएकी छन् ।

२९ औं अन्तर्राष्ट्रिय विश्व आदिवासी जनजाति दिवसको अवसरमा आयोजित शुभकामना आदानप्रदान कार्यक्रममा बोल्दै उनले यस्तो बताएकी हुन् ।

“आदिवासी जनजाति आन्दोलनमा सहभागी बनौं, परम्परागत ज्ञान, सीपको प्रवर्द्धन गर्दै पुख्र्यौली भूमि, भाषा र संस्कृतिको संरक्षण गरौं” भन्ने मूल नाराका साथ कार्यक्रमको आयोजना गरिएको थियो । नेपाल आदिवासी जनजाति महासंघ उपमहानगर सदस्य परिषद बुटवलको आयोजनामा भएको शुभकामना आदानप्रदान कार्यक्रममा बोल्दै उपप्रमुख अर्यालले जनजातिका हक, अधिकार र सुरक्षाको सुनिश्चित गरी जनजातिका समस्या समाधानमा सदैव लागि परिरहेको बताइन् ।

उनले जनजाति समूदायको साथमा रहेर आगामी दिनमा समेत अगुवाई गर्ने बताइन् । जनजातिका आआफ्नै भाषा, संस्कृति, भेषभूषा र परम्पराको जगेर्ना र संरक्षणमा सबै जनजातिहरु एकजुट भएर लागि पर्नुपर्नेमा उनले जोड दिइन् ।

उपप्रमुख अर्यालले विशेष गरी जनजाति महिलाहरु आत्मनिर्भर बनेर समाज परिवर्तनमा अग्रसर भएर लागि पर्न र निरन्तर अगाडि बढ्न समेत आग्रह गरिन् । उनले आदिवासी जनजाति समूदाय समान रुपमा अगाडि बढ्न पाउनुपर्नेमा जोड दिइन् । जनजाति समूदायका आ–आफ्ना हक, हित र अधिकार प्राप्तिका लागि राज्यसँग आफ्ना मागहरु शान्तिपूर्ण आन्दोलनबाट राख्नुपर्ने बताइन् ।

हरेक आदिवासी जनजाति महिलाहरु चुलो चौकिमा मात्र सिमित नरही आर्थिक, सामाजिक, शैक्षिक, स्वास्थ्य, न्यायिक, राजनैतिक जस्ता हरेक क्षेत्रमा अग्रसर र आत्मविश्वासी भएर आत्मनिर्भर बन्न समेत आग्रह गरिन् । उनले आफू नेतृत्वमा आन्दोलनबाट नै आएको र आफ्ना हक अधिकार पाउन आन्दोलन गरेको दावी गर्दै आन्दोलनबाट नै धेरै उपलब्धी गरेको बताइन् ।

कार्यक्रममा नेपाल आदिवासी जनजाति महासंघ बुटवल उपमहानगर समन्वय परिषदका अध्यक्ष अरुण श्रेष्ठले आदिवासी जनजाति समुदाय एकजुट भएर अगाडि बढ्न अपिल गरे । उनले आदिवासी जनजाति समुदायको सर्वाङ्गीण विकासका लागि राज्यको तीनै तहको ध्यानाकर्षण गराए ।

आदिवासी जनजाति समुदायको भाषा, संस्कार तथा संस्कृति राज्यको सम्पति भएकाले यसको संरक्षण र सम्बर्द्धनमा उचित ढङ्गले राज्यको ध्यान जानुपर्ने कुरामा समेत बुटवल उपमहानगरपालिकाको ध्यानाकर्षण गराए ।

कार्यक्रममा फोनिज रुपन्देहीका अध्यक्ष सोनु थापाले आदिवासी जनजातिहरु सबैले आफ्ना समूदाय र जातिको हक र अधिकार प्राप्तिका लागि आफ्नो ठाउँबाट महत्वपूर्ण भूमिका खेल्नुपर्नेमा जोड दिए ।

विश्व आदिवासी जनजाति दिवस मनाईरहँदा कतिपय देशहरुले सार्वजनिक विदा दिएको जानकारी गराउँदै उनले सरकारले पूर्वमा सार्वजनिक विदा दिएपनि लुम्बिनी प्रदेशमा भने सार्वजनिक विदा नदिईएको भन्दै आपत्ति जनाए ।

जनजाति समुदायका भाषा, भेषभूषा र संस्कृतिको जगेर्ना गर्न राज्यले दायित्व बहन गर्नुपर्नेमा जोड दिए । जनजाति समुदाय लामो समयसम्म निदाएकाले अब जाग्नुपर्ने नेपाल महिला मगर संघका केन्द्रीय सचिव चन्दा थापाले बताइन् । कार्यक्रम, सभा, समारोहमा उपस्थित भएर , भाषा मात्र बोलेर र आफ्नो भेषभूषा प्रदर्शन गरेर मात्र आदिवासी जनजाति समुदायले आफ्ना, हक, अधिकार र पहिचान प्राप्त गर्न नसक्ने बताउँदै त्यसका लागि आन्दोलन गर्नुपर्ने बताइन् ।

तीन तहको सरकारले आदिवासी जनजाति समूदायको पहिचान गरी भाषा, भेषभूषा, संस्कृति, मूल्य मान्यता, रितिरिवाज र परम्पराको जगेर्ना र संरक्षणमा जोड दिनुपर्ने बताइन् ।