खोज

प्यूठान, २२ साउन ।  सरुमारानी गाउँपालिका–३ हंसपुर प्यूठानमा हंसपुर बृहत खानेपानी योजना सम्पन्न भएको छ । एउटै योजनाबाट गाउँका ३ सय २५ घरधुरी प्रत्यक्ष लांभावित भएका छन् । गाउँपालिकाको यो सवैभन्दा ठूलो खानेपानी योजना हो । उक्त योजनाबाट साविक हंसपुरका वडा नंवर १,२,३ र ४ का डाडाटोल, गाहाचौपारी, गोठेरि सजिकोटका घरधुरी लाभान्वित भएका हुन् ।

गाउँपालिकाको चार करोड ४३ लाख ३८ हजार ६ सय २ रूपैयाँ लागतमा योजना सम्पन्न भएको गाउँपालिका अध्यक्ष झगबहादुर विश्वकर्माले जानकारी दिए । पालिकाका सबै घरधुरीमा पानीका धारा पु¥याउने लक्ष्य अनुसार योजना अघि बढिरहेको उनको भनाइ छ ।
विश्वकर्माका अनुसार तीन किलोमिटर तलको माडीखोलाबाट लिफ्टिङ मार्फत ६ सय मिटरमाथी डाँडामा पानी ल्याइएको हो । पानी संकलनका लागि डाँडामा सात वटा ट्याङकी निर्माण गरिएको छ । आर्थिक वर्ष २०७४/०७५ देखि योजना शुरु भएतापनि बीचमा कोभिड लगायतका कारण काममा ढिलाई भएको अध्यक्ष विश्वकर्माले जानकारी गराए । गाउँमा खानेपानी योजना सम्पन्न भएर घरघरै पानी आएको खुशीयालीमा बाजागाजासहित स्थानीयले उत्सव जस्तै गरेर हर्ष मनाए ।

खानेपानी आयोजनाको उद्घाटन गर्दै लुम्बिनी प्रदेशसभा सदस्य एवं पूर्व मन्त्री तुल्सीराम शर्माले आयोजनाको संरक्षण र रेखदेखमा ध्यान दिन स्थानीयलाई सुझाव दिए । वर्षौंदेखि खानेपानीको अभावमा पीडा झेल्दै आएका यस क्षेत्रका स्थानीय घरघरमा पानीको धारा पुगेपछि उत्साहित भएको वडाअध्यक्ष भिमबहादुर मर्साङ्गिले प्रतिक्रिया दिए । हालसम्म गाउँपालिकाभरि दुई हजार ६ सय ६६ घरमा पानीको धारा पुगेको र तीनवटा ठूला आयोजना निर्माणाधीन अबस्थामा रहेको गाउँपालिका अध्यक्ष विश्वकर्माले जानकारी दिए ।