खोज

सल्यान, २२ साउन ।  आगामी दशैंसम्म लालपुर्जा वितरण गर्ने लक्ष्य सहित सल्यानको त्रिवेणी गाउँपालिकामा भूमिहिन दलित, भूमिहीन सुकुम्बासी र अब्यवस्थीत बसोबासीहरूको लालपूर्जा वितरणको लागी जग्गा नाप नक्सा कार्य सुरु भएको छ । गाउँपालिकाको वडा नम्बर ३ स्थित तल्लो कारेवासमा आइतबार जग्गा नाप नक्साको कार्य थालिएको हो ।

त्रिवेणी गाउँपालिका भित्र भूमिहिन दलित १७ जना, भूमिहिन सुकुम्बासी १२ जना र अवस्थित बसोबासीहरू १ हजार ६८ जना गरि १ हजार ९७ जना रहेको गाउँपालिकाले जनाएको छ । गाउँपालिका अध्यक्ष खिम बहादुर रावतले भूमिहिनहरूलाई छिटै लालपूर्जा वितरण गरेर जग्गाको मालिक बनाउने बताए । अब्यवस्थित बसोबास गरिहरेकालाई व्यवस्थित गर्नको लागि नाप नक्साको कार्यमा सहयोग गरी बास्तबिक भूमिहिनलाई जग्गा दिलाउन सहयोग गर्न उनले भुमि आयोगसंग अनुरोध गरेका छन् ।

जग्गा नाप नक्सा कार्य सुरुवात गर्ने कार्यक्रममा जिल्ला समन्वय समिती सल्यानका अध्यक्ष बेलाराम रावलले त्रिवेणी गाउँपालिकाले जिल्लामै पहिलोपटक भूमिहीनलाई लालपूर्जा बितरणको लागी काम सुरुवात गरेकोमा खुसी ब्यक्त गरे । भूमिहीन दलित र भूमिहिन सुकुम्वासीलाई प्राथमिकता राखेर काम गरिरहेको भन्दै नाप नक्साको कार्य समयमै सम्पन्न भए दशैंसम्म लालपूर्जा बितरण गरिने राष्ट्रिय भूमि आयोग सल्यानका अध्यक्ष वीर बहादुर सेजवालले जानकारी दिए ।