खोज

दाङ, २० साउन ।

घोराही उपमहानगरपालिका –६ गौरी डाँगीलाई आँखा पाक्ने रोगले सताएको तीन दिन भयो । सुरुमा आँखा बिझाउने, चिलाउने र रातो हुँदै गएको र आँखाबाट आँसु आउने, दुख्ने समस्या भए पनि उपचार गर्न घोराहीमा रहेको न्यु राप्ती अप्टिकल एन्ड आइकेयर सेन्टरमा पुगिन । त्यहाँ डाक्टरले जाँच गरि औषधि दिएपछि आँखा हेर्न केही सजिलो भएको बताइन् । समय मै उपचार गरे निको हुने उनले बताइन् ।

लमही नगरपालिका –३ बिशाल वलीलाई पनि आँखामा समस्या आयो । बेलुका सुत्दासम्म केही भएको थिएन । बिहान उठ्दा आँखामा चिप्रा आएर टालिएको थियो । आँखा खोल्न पनि मिलेन अनि लमहीमा रहेको आँखा अस्पतालमा उपचार गर्न आएको बताए । उनले भने, “मलाई यस्तो भएको तीन दिन भयो । घाममा हेर्न, मिल्दैन्, असाध्यै दुख्ने गरेको छ ।” औषधिको प्रयोगले केही कम भएको छ । घरका अन्य दुइ सदस्यलाई पनि यस्तो समस्या देखिएको उनले बताए ।

दाङमा आँखा पाक्ने रोगका बिरामीहरू बढ्दै गएका छन् । नेपाल नेत्रज्योति संघ, राप्ती आँखा अस्पताल रक्षाचौरमा दैनिक पाँच सय भन्दा बढी आँखाका बिरामी आउने गरेको अस्पतालका नेत्र अधिकृत शालिकराम गौतमले बताए । उनका अनुसार एक हप्ता अघि अस्पतालमा दुइ सय ५० सरदर आँखा उपचारमा आउने गरेपनि हाल दैनिक साढे पाँच सय देखि छ सयसम्म बिरामीहरू आउने गरेको बताए ।

उनका अनुसार बिरामीहरूमा कन्जन्टेभाइटिस, आँखा चिलाउने, रातो हुने, आँखा सुनिने र सुक्खा आँखाजस्ता समस्या पाइने गरेको छ । कन्जन्टेभाइटिस अर्थात आँखा पाक्ने रोग गर्मी मौसममा बढ्ने गरेको पाइन्छ, यो सरुवा रोग हो । “यसमा आँखाबाट आँसु बग्ने, चिप्रा लाग्ने, परेलीको डिल सुन्निने जस्ता समस्या हुन्छ”, उनले भने ।

सङ्क्रमण विभिन्न कारणले हुने हुँदा सम्बन्धित बिरामीले अस्पतालमै गएर जाँच गराउनुपर्छ, आँखाको भाइरल एउटा परिवारमा देखिए सबैमा सर्न सक्ने भएकाले सरसफाइमा ख्याल गर्नुपर्ने उनको भनाई छ ।

लमही आँखा अस्पतालका नेत्र सहायक विमल घिमिरेले आँखा पाक्ने समस्या भएका बिरामी दैनिक दुइ सय देखि तीन सय जना आउने गरेको बताए । उनले त्यसमा ६० प्रतिशत आँखा बिझाउने, रातो हुने, आँसु आउने, घाममा हेर्न नमिल्ने लक्षण भएका बिरामीहरू आउने गरेको बताए । उनका अनुसार बितेको पाँच दिनदेखि बिरामीहरूको संख्या बढ्दै गएको छ ।

यसबाट बच्ने उपायहरू भाइरल र ब्याक्टेरियल आँखा पकुवा सरुवा रोग भएकाले रोगीले प्रयोग गरेका वस्तुहरू प्रयोग नगर्ने, हातमुख धुनेजस्ता काम गरेर व्यक्तिगत स्वास्थ्यको संरक्षण गर्ने, आँखा पाकेका बिरामीले प्रयोग गरेका रुमाल, कपडा, ओछ्यान आदिको प्रयोग नगर्ने सल्लाह दिएका छन् ।

नेपाल नेत्रज्योति संघ अन्तर्गत सञ्चालित राप्ती आँखा अस्पताल, लमही आँखा अस्पताल, छन्द कालेबाबु नारायण आँखा अस्पताल बहादुरगञ्ज, तिलगंगा सर्जिकल आँखा केन्द्र सिसहनिया, भालुबाङ आँखा उपचार केन्द्र तथा अन्य आँखा उपचार केन्द्रमा आँखा पाक्ने रोगका बिरामी बढेको जनाइएको छ ।