खोज

सुनवल, १८ साउन ।

पश्चिम नवलपरासीमा पनि आँखा पाक्ने रोग देखा परेको छ । पश्चिम नेपालका विभिन्न जिल्लामा प्रकोपको रुपमा फैलिएको आँखा पाक्ने रोग जिल्लाको रामग्राम प्रतापपुर लगायतका स्थानमा पनि देखा परेको हो ।

रामग्राम नगरपालिकाको वडा नम्बर ६, १६ लगायतका वडामा आँखा पाक्ने रोगका संक्रमित भेटिएपछि नगरपालिकाले आवश्यक सावधानी अपनाउन आग्रह गरेको छ । संक्रमण फैलिन थालेको थाहा पाउने वित्तिकै स्थानीय विपद् व्यवस्थापन समितिको बैठक बसेर आवश्यक औषधि खरिद, जनचेतना अभिवृद्धि लगायतका काम तत्काल अघि बढाउने निर्णय भएको नगर प्रमुख धनपत यादवले बताए ।

प्रकोपको रुपमा आँखा पाक्ने रोग फैलिने सम्भावना रहेकाले औषधिको अभाव नहोस् भनेर विपद् व्यवस्थापन कोषबाट एक लाख रुपैयाँ बराबरको औषधि खरिद गरी सबै स्वास्थ्य संस्थामा वितरण गर्ने नगर प्रमुख यादवले बताए । नगर मातहतका सबै स्वास्थ्य संस्थामा आवश्यक औषधिको व्यवस्थापन गर्ने रोगका विषयमा जनचेतना फैलाउन नगरपालिकाले काम सुरु गरेको उनको भनाई छ । सञ्चारमाध्यमबाट पनि रोगका विषयमा आवश्यक सन्देशमुलक सामग्री प्रशारण तथा प्रकाशन गर्ने निर्णय भएको जनाईएको छ । नगरपालिकाको स्वास्थ्य शाखाका जनस्वास्थ्य निरीक्षक सुरज हरिजनले सबै स्वास्थ्य संस्थामा औषधिको व्यवस्थापन गरी सचेतना फैलाउने र विद्यालयमा पनि निगरानी गर्ने बताए । विशेषगरी बालबालिकामा बढी संक्रमण फैलिरहेको सन्दर्भमा विद्यालय संक्रमणको इपिसेन्टर हुन सक्ने भएकाले सावधानी अपनाउनुपर्ने उनले बताए ।

नगर प्रमुख यादव सहितको टोलीले विनोद निता कण्डेल, आँखा अस्पतालका नेत्र विशेषज्ञ डाक्टर नेत्र बहादुर मगर, व्यवस्थापक तुलसी प्रसाद पराजुली संग पनि छलफल गरेको छ । नगर प्रमुख यादवले महामारीको रुपमा फैलिएमा के गर्ने भन्ने विषयमा पहिल्यै आवश्यक तयारी सुरु गरिएको बताए । आँखा अस्पतालका व्यवस्थापक पराजुलीले यो संक्रमणको त्यसै नफैलिने भएकाले आवश्यक सावधानी अपानउन आग्रह गरे ।

बढी भिडभाडमा नजाने, आँखा हातले नछुने, सावुनपानीले हात सफा गर्ने लगायतका सावधानी अपाउनुपर्ने उनको भनाई छ । संक्रमण भएपछि औषधिले एक हप्ता सम्ममा निको हुने कुनै जटिलता अस्पतालमा सम्र्पक गर्नुपर्ने पराजुलीले बताए । संक्रमण भएपछि आँखा चिलाउने, आँखा रातो हुने, पाक्ने र अत्याधिक दुख्ने समस्या देखिएको छ ।

अहिले फैलिएको संक्रमणले दृष्टिबिहीन नबनाए पनि आँखाको सेतो भागमा असर पार्न सक्ने भएकाले जोखिम भने रहेको चिकित्सकहरुले बताउने गरेका छन् । बढी नै दुख्ने, पोल्ने र चिलाउने गरेमा भने नजिकको आँखा उपचार केन्द्रमा जानुपर्ने चिकित्सकको सुझाव छ । चिकित्सकका अनुसार सरुवा रोग भएकाले आँखाको संक्रमण एकबाट अर्कोमा चाँडो सर्छ । संक्रमण भएका बालकालिकामा आँखा रातो हुने, कचेरा आउने, आँखा टालिने, सुन्निने, अत्यधिक दुख्ने, पोल्ने, हेर्न गाह्रो पर्ने, निरन्तर आँसु बग्नेलगायतका समस्या देखिएको छ । बालबालिकाबाट ठूला मान्छेमा पनि संक्रमण सरिरहेको छ ।