खोज

नवलपुर, १६ साउन ।

नवलपरासी पूर्व नवलपुरको मध्यविन्दु नगर अस्पतालमा बिरामी भर्ना सेवा शुरु भएको छ ।

यस अगाडि अस्पतालबाट बहिरङ्ग सेवा प्रदान हुँदै आएको थियो । १५ शैयाको नगर अस्पतालमा शुरुवातमा ७ शैयाबाट अन्तरङ्ग सेवा सञ्चालन हुने अस्पतालका प्रमुख नन्दलाल राना मगरले बताए । अस्पतालबाट यस अगाडि सर्पदंश, रेविज, प्रयोगशाला, प्रसुती लगायतका स्वास्थ्य प्रवाह हुँदै आएको थियो । अस्पतालमा आउने सेवाग्राहीको स्वास्थ्य उपचारलाई व्यवस्थित र थप प्रभावकारी बनाउन भिडियो एक्सरे सेवालाई नियमित र विशेषज्ञ सहितको स्वास्थ्य परिक्षण सेवा थप गर्ने योजनामा रहेको उनले बताए ।

मध्यविन्दु नगरपालिका र आसपासका स्थानीयहरुको लागि सहज स्वास्थ्य पहुँच स्थापना नगरपालिकाको प्राथमिकतामा रहेको नगर प्रमुख भिमलाल अधिकारीले बताए । निर्माणाधीन नगर अस्पतालको सुविधा सम्पन्न अस्पताल निर्माणको कार्य सम्पान्न भएपस्चात थप सेवाहरु समेत बिस्तार हुने उनले बताए । उनले नागरिकहरुलाई अस्पताल सम्म ल्याउने र उनीहरुको विश्वास जित्नेगरी सेवा प्रवाह गर्न समेत अस्पतालमा कार्यरत चिकित्सक र प्रशासनका कर्मचारीहरुलाई अनुरोध गरेका छन । क्रमशः अस्पतालमा सेवा लिन आउने नागरिकहरुको संख्यामा बृद्धि भइरहेको भन्दै उनले नागरिक मैत्री सेवाप्रवाह हुनुपर्नेमा जोड दिएका छन् ।

मध्यविन्दु नगरपालिका पूर्व नगर प्रमुख चन्द्र बहादुर रानाले विगतको अवस्थाबाट हाल अवस्था सम्म आईपुग्दा विभिन्न चरणहरु पार गरेको स्मरण गर्दै नागरिकलाई प्रवाह गरिने सेवाको गुणस्तरीयता र विश्वनियतामा ध्यान दिनुपर्ने बताए । नगर अस्पताल निर्माण पश्चात सबै नागरिकलाई सहज सेवा प्रवाह हुने उनले विश्वास व्यक्त गरेका थिए ।

मध्यविन्दु नगरपालिकाका प्रमुख प्रशासकीय अधिकृत ज्ञानु प्रसाद पनेरुले विपन्न र ग्रामीण स्तरमा रहेका नागरिकहरु आर्थिक अवस्थाकै कारण स्वास्थ्य सेवाबाट बञ्चित हुनुपर्ने अवस्था नहोस् भन्नेतर्फ सबैको ध्यान पुग्न आवश्यक रहेको बताए ।

स्वास्थ्य कार्यालय नवलपुरका प्रमुख केशवप्रसाद चापागाईंले अझैपनि आम नागरिकहरु स्वास्थ्य बिमा कार्यक्रमको पहुँचमा पुग्न नसकेको भन्दै स्वास्थ्य बिमा कार्यक्रमलाई प्रभावकारी बनाउन सक्दा स्थानीय समुदायलाई उपचार वापत लाग्ने खर्च बोझको कमी संगै अस्पताल सञ्चालनमा समेत सहयोग पुग्ने बताए ।

साविकको चोरमारा प्राथमिक स्वास्थ्य केन्द्रलाई मध्यविन्दु नगर अस्पतालमा स्तरोन्नती गरिए पश्चात पुरानै भवनबाट अस्पतालले आफ्नो सेवा प्रवाह गर्दै आएको छ । १५ शैयाको सुविधा सम्पन्न भवन निर्माणको चरणमा रहेको मध्यविन्दु नगर अस्पतालको भवन निर्माण सम्पन्न भएपश्चात सेवा प्रवाह थप प्रभावकारी हुने अस्पतालका उपाध्यक्ष अमृत प्रसाद ज्ञवालीले विश्वास व्यक्त गरेका छन् ।