खोज

बुटवल, १५ साउन ।

हिन्दु धर्मावलम्बीहरुले मान्ने आशौच, ज्योतिषशास्त्र र वास्तुका विषयमा देखिएका विविध अन्यौलतालाई चिर्न बुटवलमा पहिलोपटक धर्म, ज्योतिष तथा वास्तु सम्मेलन २०८० हुने भएको छ ।

विश्व ज्योतिष महासंघ लुम्बिनी प्रदेशको आयोजना तथा लुम्बिनी पुजा सामग्री भण्डारको सहआयोजनामा साउन १९ र २० गते दुई दिने सम्मेलन हुने भएको हो ।

सोमबार बुटवलमा पत्रकार सम्मेलन गरी सम्मेलनबारे जानकारी गराइएको हो । सिद्धार्थ कटेजमा हुने दुई दिने कार्यक्रमको तयारी पूरा भएको विश्व ज्योतिष महासंघ लुम्बिनी प्रदेशका अध्यक्ष जनार्दन न्यौपानेले बताए । देशभरबाट ५ सय बढी पण्डितहरु सहभागी हुने कार्यक्रममा नविकरण, आवश्यक तयारीहरु सबै पूरा भएको उनले बताए । काजकिरियालाई छोट्याउन मिल्ने वा नमिल्ने भन्ने विषयमा समाजमा बहस भैरहेको भन्दै उनले यस विषयमा गरुड पुराणमा विस्तृत व्याख्या रहेको बताए ।

एउटा मनुष्यको विकासक्रमको १० दिने विस्तृत ब्याख्या यसमा रहेको तर्क दिंदै उनले १३ दिन बार्ने कुरा वैज्ञानिक र तथ्यपूर्ण रहेको दाबी गरे । धर्मशास्त्र अन्तर्गत आशौच परिचय र निर्णयहरु प्रा. डा. देवमणि भट्टराई, ज्योतिषशास्त्र अन्तर्गत बैदेशिक यात्रा उप प्राध्यापक लक्ष्मीप्रसाद बराल तथा बास्तु र जीवनको बारेमा डा. माधवमंगल जोशीले कार्यपत्र प्रस्तुत गर्नेछन् ।

यसैगरी कार्यक्रममा निष्कर्ष निकालेर घोषणापत्र समेत जारी गरिने र मुखपत्रका रुपमा पुस्तक प्रकाशन गरिने उनले बताए । यो सम्पूर्ण पण्डित र हिन्दु धर्मावलम्बीहरुलाई उपयोगी पुस्तक हुने उनले बताए । “धर्मसिन्धु, निर्णयसिन्धु जो विधि विधानका रुपमा रहेको पाउँछौ । त्यसकै आधारमा नै मतमतान्तर छन् । हजार वर्षअघि बनेको यो धर्मग्रन्थ विस्तृत रहेको छ”–उनले भने । हरेक क्षेत्रमा विकृति रहेको र केही रुपमा ज्योतिष क्षेत्रमा पनि देखिएको र यसलाई सुधार गर्ने अभियान थालेको उनले बताए । नेपाल पञ्चाङ्ग निर्णायक समिति अन्तर्गत रहेका परीक्षा प्रणालीमार्फत वर्ग छुट्टयाएर अधिकार दिनुपर्ने भन्ने कुरालाई जोड दिएको समेत उनले बताए । सम्मेलनमा भारतबाट समेत ज्योतिष आउने छन् ।

कार्यक्रममा महासंघका उपाध्यक्ष चेत नारायण सुवेदी, उपाध्यक्ष मनोहर घिमिरे, नेपाल ज्योतिष महासंघका केन्द्रीय सदस्य सुन्दर भण्डारीले नेपालमै पहिलोपटक सम्मेलन एक, विषय अनेक नारा दिएर कार्यक्रम गर्न लागेको बताए । हिन्दु धर्मावलम्बीहरुले १३ दिन बार्ने, धर्म विषयमा रहेर हाम्रो आफन्तको मृत्युमा बार्नुपर्ने के के हुन् भन्ने विषयको समाधान निस्कने बताए ।

प्रदेशस्तरीय २१ सदस्यीय समिति एक महिना अघि मात्र गठन भएको महासचिव कमल पौडेलले बताए । हाल प्रदेशमा १ हजार बढी पण्डित, ज्योतिषहरु रहेको उनले बताए । हाल महासंघमा ४७ देशका ज्योतिषहरु संगठित रहेका छन् । नेपालबाट नयाँ ज्योतिष तयार गर्ने र विश्वभरका ज्योतिषहरुलाई एकतावद्घ गराउने उद्देश्य रहेको उनले बताए ।