खोज

दाङ, १५ साउन ।

घोराही उपमहानगरपालिका–५ धर्ना धारापानीस्थित पाण्डवेश्वर महादेव मन्दिर धारापानीमा साउन २ गतेदेखि ३१ गतेसम्म पुरुषोत्तम माहात्म्य एवम् शृङ्गारिक आरती बोलबम मासिक महामहोत्सव सञ्चालन भएको छ ।

मन्दिरको प्रचारप्रसार तथा धर्म र धार्मिक आस्था थप सुदृढ बनाउने उद्देश्यले पुरुषोत्तम महात्म्य एवम् शृङ्गारिक आरती बोलबम मासिक महामहोत्सव सञ्चालन गरेको महामहोत्सव मूल व्यवस्थापन समितिका संयोजक गणेशकुमार अधिकारीले जानकारी दिए ।

उनले भने, “मलमासको समयमा मात्रै सञ्चालन हुने भएकाले धारापानी धाममा महामहोत्सवको आयोजना गरेका हौं ।” महामहोत्सवमा अन्तर्राष्ट्रिय स्वर्णपदक विभूषित पण्डित अमृतशरण देवाचार्यले पुरुषोत्तम माहात्म्य प्रवचन दिइरहेका छन् । त्यस अवसरमा वाराणसी समूहले प्रत्येक दिन बेलुकी वैदिक शृङ्गारिक गङ्गा आरती गर्ने गरेको संयोजक अधिकारीले बताए । उनका अनुसार महामहोत्सव अवधिभर मण्डव पूजा तथा हवन सञ्चालन, पुरुषोत्तम माहात्म्य पाठ पारायण, सङ्गीतमय लीलामय पुरुषोत्तम माहात्म्य प्रवचन, पुरुषोत्तम एवम् बोलबम महाआरती र सङ्गीतमय लीलामय प्रवचन तथा भजन सञ्चालन भैरहेको छ ।

धारापानीमा आउने पर्यटकका लागि आकर्षक थपिएको छ, सन्ध्या आरती । मनोरम दृश्यावलोकनबाट भ्रमणको शुभारम्भ गरेका पर्यटकहरु मठमन्दिर, विश्वको अग्लो त्रिशुल, एक सय आठ गौमुखी धारा, ओमकार पोखरी र अन्य मठ मन्दिर अवलोकनपश्चात साँझ भने सन्ध्याआरतीमा सहभागी हुने गरेका छन् ।

धारापानीको मूल मन्दिरको प्राङ्गणमा प्रत्येक दिन साँझ तीन जना युवा पण्डितबाट सङ्गीतमय धुनमा हुने सन्ध्या आरतीमा पछिल्लो समय भिड लाग्ने गरेको छ । आरती दर्शन गर्न विभिन्न उमेर समूहको रोजाई परेको छ ।

धारापानी मन्दिर व्यवस्थापन समिति सचिव विष्णुराम आचार्यका अनुसार आरतीमा धुप, घिउ, कपुर, मयुरपङ्ख, ल्वाङदानी, सेतोचमर, अलैँचीदाना र फूलपातीलगायतका विभिन्न सुगन्धित वस्तुको प्रयोग गरिन्छ । शङ्ख ध्वनीबाट शुभारम्भ हुने आरती समापनपछि भजन गाएर भक्तजनलाई नचाएर मनोरन्जन दिने गरिएको छ ।

भक्तजनको साथ र सहयोगले नै निरन्तरता दिन सकेको उनले बताए । भक्तजनबाट सहयोग प्राप्त भएको रकमबाट काम अगाडि बढेको सचिव आचार्यले बताए । दैनिक हुने आरतीमा भाग लिन चाहने भक्तजनले सचिवालयमा सम्पर्क गरेर (आठ हजार रुपैयाँ) दान गरेमा एक दिनको आरती संकल्प गर्ने व्यवस्था गरेको उनले बताए ।

पर्यटक तथा स्थानीय बासिन्दाका लागि दिनभरिको व्यस्तता एवं तनाव व्यवस्थापनका लागि साँझमा हुने आरतीमा सहभागी हुँदा आनन्द आउने गरेको घोराही उपमहानगरपालिका– ६ जजरागाउँका ध्रुवराज अधिकारी बताउँछन् । उनी मावि जजरागाउँका शिक्षक हुन् । दिनभरीको कामको थकाइ मेटिने र मेडिटेसन हुने गरेको उनले बताए । दैनिक एक हजार देखि १५ सय भक्तजनले आरती दर्शन गर्ने गरेको आयोजक समितिले जनाएको छ ।

महामहोत्सव आयोजक समितिले जिल्लामै पहिलो पटक संचालन भएको पुरुषोत्तम माहात्म्य एवम् शृङ्गारिक आरती बोलबम मासिक महामहोत्सवमा सहभागी हुन र अमृत पान गर्न भक्तजनहरुमा अनुरोध गरेको छ ।