खोज

सुनवल, १४ साउन ।

नेपाल रेडक्रस सोसाईटीका नवनिर्वाचित केन्द्रीय अध्यक्ष प्राध्यापक सुदर्शन प्रसाद नेपालले रेडक्रस सोसाईटी गम्भीर अवस्थाबाट गुज्रिरहेको बताएका छन् । आइतबार पश्चिम नवलपरासीको सदरमुकाम परासीमा नेपाल रेडक्रस सोसाईटी नवलपरासी शाखाले आयोजना गरेको स्वागत तथा बधाई कार्यक्रममा बोल्दै नेपालले रेडक्रस सोसाईटी कोल्याप्स हुने खतरा बढेको बताउँदै यसलाई बचाउन सबै एकजुट हुनुपर्नेमा जोड दिए । कुनै बेला एसियामै उत्कृष्ट मानिने रेडक्रस सोसाईटी अहिले आफ्नो आधिकारिता र साख जोगाउन संघर्षरत रहेको बताउँदै यसमा सफलता प्राप्त हुने विश्वास व्यक्त गरे । “कोमामा पुगेको रेडक्रस सोसाईटीलाई अहिले जनरल बेडमा ल्याएका छौ”–अध्यक्ष नेपालले भने, “चुनौती धेरै बाँकी छन् तर गर्न सकिन्छ भन्ने अठोटका साथ अगाडि बढेका छौ ।”

एउटा पक्ष अझै पनि व्यक्तिवादी प्रवृत्तिलाई अंगिकार गरेर गतिरोध सृजना गर्न खोजेको बताउँदै उनले चुनाव मार्फत नयाँ नेतृत्व आईसकेको अवस्थामा त्यसको कुनै अर्थ नभएको टिप्पणी गरे । जेनेभा सम्म धाएर रेडक्रस सोसाईटी बचाएको उल्लेख गर्दै नेपालले अब पनि नविकरण लगायतका काम तत्कालै पुरा गर्नुपर्ने जिम्मेवारी पुरा गर्न लागिपरेको बताए ।

नेपाल रेडक्रस सोसाईटीलाई नविकरणको लागि यो वर्ष अन्तिम वर्ष भएकाले अहिले लेखापरिक्षण लगायतका काम गरेर सोसाईटीलाई आधिकारिता प्रदान गर्ने प्रयासमा नयाँ कार्यसमिति लागेको अध्यक्ष नेपालले बताए । सोसाईटीका नवनिर्वाचित केन्द्रीय सदस्य अनुप कुमार श्रेष्ठले लिक बाहिर गएको संस्थालाई लिकमा ल्याउन अहिले सफल भएपनि थुप्रै चुनौती बाँकी नै रहेको उल्लेख गरे । सोसाईटी नवलपरासी शाखाका सभापति राजेन्द्र प्रसाद अग्रहरीले जिल्ला शाखाका लागि केन्द्रीय तहबाट प्रर्याप्त सहयोग नभएको गुनासो गरे ।

देशमै उत्कृष्ट शाखाको रुपमा रहेको भएपनि आर्थिक रुपमा निकै कमजोर भएको उल्लेख गर्दै अग्रहरीले स्थानीय तहबाट सहयोग लिएर काम गर्दै आएको उल्लेख गरे । कार्यक्रममा सोसाईटीका प्रदेश कोषाध्यक्ष हैदरअली मोमिन, शाखा उपसभापति कृष्ण प्रसाद लामिछाने लगायतले नयाँ नेतृत्वले संस्थालाई सही दिशामा अगाडि बढाउने विश्वास व्यक्त गरेका थिए । विभिन्न उतारचढावका बीच साउन १ र २ गते भएको विशेष महाधिवेशनबाट रेडक्रस सोसाईटीको नयाँ नेतृत्व निर्वाचित भएको हो ।