खोज

बुटवल,१३ साउन ।   बुटवल उपमहानगरपालिकाले क्षेत्राधिकार बाहिर गएर टेम्पो चालकहरुमाथि चरम ज्यादती र अन्याय गरेको टेम्पो चालकहरुले गुनासो गरेका छन् ।
नेपाली नागरिकले देशका जुनसुकै ठाउंमा गएर पेशा ब्यवसाय गर्न पाउने संविधानले दिएको मौलिक अधिकार बिपरित बुटवल उपमहानगरपालिकाले बुटवल नगरकै स्थायी बासिन्दालाई मात्रै टेम्पो चलाउन दिने गैरकानुनी मापदण्ड बनाएको भन्दै सो मापदण्ड खारेज गर्नुपर्ने टेम्पो चालकहरुले माग गरेका छन् ।
तिनाउ टेम्पो यातायात प्रा लि मा आवद्ध टेम्पो चालकहरुले टेम्पो चलाएर गुजारा गर्ने स्वरोजगार मजदुर माथि ५ हजार, ८ हजार र १० हजार सम्म जरिवाना गर्ने र सडकमा चल्न नदिने जस्ता ज्यादती गरेको गुनासो गरे । यस्तै दोहोरो दर्ता गरेर दोहोरो कर अुसुली समेत गरेको चालकहरुको गुनासो छ ।

लुम्बिनी प्रदेश यातायात ब्यवस्था कार्यालयमा दर्ता भएर सञ्चालन भएका टेम्पोहरुलाई बिभिन्न बहानामा उपमहानगरपालिकाले एउटा टेम्पोलाई एक महिनाको अबधिमा २६ हजार रुपयाँसम्म जरिवाना तिराएको तिनाउ टेम्पो यातायात प्रा लिका अध्यक्ष महेन्द्र प्रसाद श्रेष्ठले बताए ।

टेम्पो इन्जिन जडित र पेट्रोलबाट चल्ने सवारी साधन भएकाले अटो रिक्सा भनेर बुटवल उपमहानगरले क्षेत्राधिकार बाहिर गएर गैर कानुनी हिसाबले दर्ता गर्ने र चरम महंगो जरिवाना गर्ने गरेको भन्दै यस्तो अत्याचार तत्काल बन्द गर्न टेम्पो चालकको हक हितका पक्षमा लबिङ गर्दै आएका मजदुर नेता बागबहादुर बुढामगरले बताए ।
इञ्जिनबाट चल्ने टेम्पोको नियमन उपमहानगरपालिकाको क्षेत्राधिकार भित्र नपर्ने भन्दै उनले ट्याक्सि सरह कर तिरेर यातायातमा दर्ता भएका टेम्पो जुनसुकै समथर भूभागमा चल्न पाउनुपर्ने बताए ।

‘ बुटवलमा गर्नुपर्ने थुप्रै काम छन्, झुम्सा खानेपानीको काम शुरु भएको २५ वर्ष पुगिसक्यो काम नहुंदा धमिलो पानी खानु परेको छ, फोहोर मैलाको व्यवस्थापन छैन, बोर्डिङ स्कुल मात्र हैन सरकारी स्कुलले पनि चर्को शुल्क असुलेका छन्,नगरवासीले रोजगारी पाएका छैनन,  त्यतातिर आंखामा पट्टी बांधेर बसेको छ  तर परिवारको गुजारा गर्ने, छोराछोरी पढाउने अरु विकल्प नपाएर टेम्पो चलाउन आएका मजदुरमाथि चर्को जरिवाना गरेर अनि चलाउन नदिएर बहादुरी देखाएको छ उपमहानगरले’–बुढाले भने–‘यस्तो ज्यादती तत्काल अन्त्य नभए भोको पेटले विद्रोह गर्न वाध्य हुन्छन् ।’

टेम्पो चालक जिवलाल भुसालले बुटवल उपमहानगरपालिकाले बिभिन्न बहानामा टेम्पोहरुबाट ५ हजारदेखि १० हजारसम्म जरिवाना अशुल गर्ने गरेको भन्दै टेम्पो धनिहरु दोहोरो करको मारमा परेको र कर तिरेर पनि चलाउन नपाउंदा पिडित भएको गुनासो गरे ।

अर्का टेम्पो चालक दीनेश नेपालीले आफुलाई उपमहानगरपालिकाले दुई पटक पाँच /पाँच हजार र एक पटक १० हजार गरेर २० हजार जरिवाना तिराएको बताए ।

उता बुटवल उपमहानगरपालिकाका प्रमुख प्रशासकीय अधिकृत टेकराज पन्थीले भने उपमहानगरपालिकाले टेम्पोहरुको दर्ता नगरेको भन्दै रुट परमिट मात्रै दिने गरेको प्रतिक्रिया दिए ।

बुटवल भित्र १४४० ई रिक्सा तथा अटो सञ्चालन गर्न दिने मापदण्ड बनेको भन्दै सोही मापदण्डका आधारमा कार्यबिधि बनेको र मापदण्ड बिपरित सञ्चालन भएका ई रिक्सा तथा टेम्पोलाई जरिवाना गरिएको दाबी गरे ।

अधिवक्ता जोखबहादुर खत्रीले टेम्पो दर्ता, रुट परमिट र चालकमाथिको जरिवाना यी सबै काम संविधान र कानुन विपरित बुटवल उपमहानगरपालिकाको ज्यादती भएको बताए ।