खोज

बुटवल, ११ साउन ।

केरवानी स्वास्थ्य चौकीले बार्षिक समिक्षा, योजना तर्जुमा तथा सेवा सम्बन्धी अभिमुखीकरण करण कार्यक्रम सम्पन्न गरेको छ ।

एक कार्यक्रमका बीच आर्थिक वर्ष २०७९÷०८० मा स्वास्थ्य चौकीद्वारा आफ्नै पहलमा भएका विभिन्न नविनतम कार्यहरु सार्वजनिक गरेको स्वास्थ्य चौकी प्रमुख काशिराम रेग्मीले बताए । जस अन्तर्गत भिडियो एक्सरे सेवा संचालन, महिलाहरुको पाठेघरको मुखको क्यान्सरको भिआइए विधिद्वारा नियमित जांँचको शुभारम्भ, विद्यालय स्वास्थ्य शिक्षा कार्यक्रम, स्वास्थ्य शिविर लगायतका अतिरिक्त स्वास्थ्य सेवा पनि केरवानी स्वास्थ्य चौकीले उपलब्ध गराएको उनले जानकारी दिए ।

उनले स्थानीय बासिन्दा, टोल विकास संस्था, वडा कार्यालय र स्थानीय सरकार, समाजसेवी एवं सरोकारवाला निकायको सहयोग रहेमा जिल्लामै उत्कृष्ट स्वास्थ्य चौकी बनाउन सकिने उनले बताए ।

कार्यक्रममा स्वास्थ्य सुचकांकहरुको लक्ष्य तथा प्रगति, चालु आर्थिक वर्ष २०८०÷८१ मा गुणस्तरीय स्वास्थ्य सेवा प्रवाह गर्नका लागि मिति गत साउन ५ गतेको स्वास्थ्य संस्था संचालन तथा व्यवस्थापन समितिको निर्णयानुसार तथा कर्मचारी बैठकको निर्णयअनुसार तयार गरिएको वर्ष भरिको कार्ययोजना समेत प्रस्तुत गरेका थिए ।

कार्यक्रममा प्रस्तुत भएको प्रस्तुतिकरण अनुसार स्वास्थ्य सुचकांंकका सम्पुर्ण प्रगतिहरु लक्ष्य भन्दा माथि रहेको र खोप, क्षयकुस्ठ, आमा सुरक्षा, लगायतका कार्यक्रममा शतप्रतिशत प्रगति रहेको देखिएको र उक्त कार्यक्रमहरु निरन्तर कायम गर्ने स्वास्थ्य चौकीले जनाएको छ ।

कार्यक्रमलाई सम्बोधन गर्दै देवदह स्वास्थ्य शाखा नर्सिङ निरीक्षक माया पुनले स्वास्थ्य स्वयं सेवीका र स्वास्थ्यका सम्पूर्ण कर्मचारीको उत्कृष्ट सेवाकै कारण केरवानी स्वास्थ्य चौकी जिल्लाकै उत्कृष्ट स्वास्थ्य चौकी मध्यको एक हुन सफल भएको बताइन् ।

कार्यक्रममा पुर्व वडा अध्यक्ष धर्मागत पाण्डे, वडा सदस्य णप्रसाद न्यौपाने, समाजसेवी झबिन्द्र प्रसाद पाण्डेय, स्वास्थ्यकर्मी उमानन्द भुसाल लगायतले आफ्ना भनाई राखेका थिए ।

देवदह २ मा रहेको केरवानी स्वास्थ्य चौकीमा दैनिक बिरामी जाँच तथा उपचार सेवा, निशुल्क औषधी, प्रयोगशाला सेवा, एकीकृत बालरोग व्यवस्थापन सेवा, शीघ्र कुपोषणको एकिकृत व्यवस्थापन सेवा, सुरक्षित गर्भपतन सेवा, भिडियो एक्सरे सेवा, परिवार नियोजन सेवा, पोषण तथा खोप सेवा, महिलाहरुको पाठेघरको मुखको क्यान्सर पहिचानका लागि भिआइए जांच सेवा, क्षयरोग, कुष्ठरोग, मलेरिया उपचार सेवा, २४ घन्टा सुरक्षित प्रसुति सेवा, साप्ताहिक विशेषज्ञ सेवा लगायतका सेवाहरू उपलब्ध रहेको कार्यक्रमका अध्यक्ष देवदह नगरपालिका वडा नं. २ का अध्यक्ष तथा केरवानी स्वास्थ्य चौकी सञ्चालन समितिका अध्यक्ष दलबहादुर राकस्कोटीले बताए ।