खोज

बुटवल, ११ साउन ।  अटोमोबाईल्सको क्षेत्रमा काम गर्ने ब्यवसायीहरुको साझा संस्था अटोमोबाईल्स एशोसिएशन अफ नेपाल (नाडा) लाई महासंघको स्वरुपमा लगेर बलियो बनाउने गरि सुझाव संकलन शुरु भएको छ । नेपाल अटोमोबाईल्स एशोसिएशन अफ नेपालका केन्द्रीय केन्द्रीय अध्यक्ष ध्रुव बहादुर थापासहितको केन्द्रीय टिम विशेष अभियान लिएर देश दौडाहामा हिडेका छन । सबै अटोमोबाईल्स ब्यवसायीहरुलाई संगठित गर्ने र समेट्ने लक्ष्यसहित आफुहरु लागेको बुटवलटुडेलाई अध्यक्ष थापाले बताए । ‘नाडालाई समयसापेक्ष ब्यवस्थित गर्ने लक्ष्यसहित विधान संशोधन गर्ने कामलाई प्राथमिकतामा राखेका छौ ।’—उनले भने ।

बुधबार रुपन्देहीमा नाडा अटोमोबाईल्स एशोसियशन अफ नेपाल र लुम्बिनी अटोमोबाईल्स एशोसिएशन अफ नेपालको संयुक्त अन्तरक्रिया कार्यक्रममा उनले अटोमोबाईल ब्यवसायीहरुको हकहितमा काम गर्ने एकमात्र संस्था भएको दाबी गरे । सरकारबाट ल्याएको नीति, लेभलिङका विषय र यसको प्रभाव बुझ्ने लक्ष्य रहेको उनले बताए। ब्यवसायीहरु एकजुट हुन नसके कमजोर हुने दाबी गर्दै उनले विधानमा नाडा महासंघको स्वरुपमा लैजाने, प्रदेश संरचनाभित्र जिल्ला समेट्न विषयमा छलफल गरिएको बताए । केन्द्रमा भिजन पोलिसी निर्माणको काम, ईन्स्योरसंग क्षमता विकासको कामलाई अघि बढाएको उनले बताए । मौन्द्रिक निती पुनरावलोकन गर्ने सरकारबाट प्रतिवद्घता आएको उनले बताए ।

कार्यक्रममा केन्द्रीय उपाध्यक्ष राजनबाबु श्रेष्ठ, निराकर श्रेष्ठ, केन्द्रीय महासचिव सुरेन्द्र कुमार उप्रेतीले केन्द्रस्तरबाट विधान संशोधन गर्नेभन्दा पनि जिल्ला र प्रदेश तहबाट नै सुझाव संकलन गरि संशोधन गर्ने गरि आफुहरु लागेको बताए । संस्था बलियो र शसक्त बनाउन मुल लक्ष्य लिएर एकतावद्घ हुनुपर्ने बताए । संस्था कमजोर हुदा सरकारको ठोस निति ल्याउनेभन्दा पनि प्रत्येक वर्ष परिवर्तन हुने समस्या रहेको उनले बताए ।
रुपन्देहीमा एउटै ब्यवसायमा आवद्धहरु दुई संस्थामार्फत अघि बढेको बेला मिलाएर जानुपर्ने उनीहरुको सुझाव दिए । यता अडानका उपाध्यक्ष पुरन ज्ञवालीले चार पाग्रे सवारी कारोबारमा आवद्धहरु संगठित भएर अडान गठन गरेको बताए। भन्सार, सरकारको करनिति जस्ता समस्याहरु देखिएको र यसलाई समाधानमा जोडदिनुपर्ने सुझाव दिए । चारपाग्रे सवारी बिक्रेता डिलरलाई समेटेर २७ जना रहेको उनले बताए । यसैगरि महासचिव देबेन्द्र पौडेलले अडान गठन गरिरहदा आफुहरु नाडाको पहिलेबाट नै सदस्य रहेको बताए । संगठनमा नया सदस्य संख्या बढाउनेभन्दा पनि गुणस्तरीयतालाई जोड दिनुपर्ने उनले सुझाव दिए ।

नाडा लुम्बिनीका अध्यक्ष गणेश भट्टराईले आफ्नो कार्यकालमा ब्यवसायिक हकहितसंगै सामाजिक गतिविधि गर्न सफल भएको बताए । भिसिटिएस तालिम, ब्यवसायीहरुलाई कर तालिम गर्दै आएको उनले बताए । दुबै संस्थालाई मिलाउने गरि पटकपटक बैठक बसाउने पहल थालेको उनले बताए । प्रदेश संरचना रहेका ब्यवसायिहरुलाई प्रदेश अन्तरगत सदस्यता लिने ब्यवस्था गर्नुपर्ने लुम्बिनी नाडाका महासचिव रोशन पाण्डेले सुझाव दिए । केन्द्रबाट सदस्य बाडिदा पनि अहिले कतिपय जटिलता देखिएको उनले बताए ।