खोज

नवलपुर, ८ साउन ।

पूर्वी नवलपरासीमा अहिले लम्पीस्किनका कारण पशु चौपाया संक्रमित हुने क्रम बढ्दो रहेको छ । जिल्लामा हाल सम्म पाँच हजार ९९६ पशुचौपाया सङ्क्रमित भएका छन् ।

जिल्लामा यस रोगबाट हालसम्म चार सय ५४ गाईभैँसी मरेका भेटेरिनरी अस्पताल तथा पशु सेवा विज्ञ केन्द्रले जनाएको छ । केन्का प्रमुख पशु चिकित्सक डा. ऋषभ गुरागाईंले जिल्लाका गाईभैँसीमा लम्पी स्किन महामारीका रुपमा फैलिएको जानकारी दिएका छन् ।

पूर्वी नवलपरासीमा बिगत १७ दिनदेखि यो रोग देखा पर्न थालेको र अहिले निक्कै भयावह ढंगले फैलिरहेको गुरागाईको भनाइ छ । जिल्लामा लम्पी स्किन नियन्त्रणका लागि खोप तथा औषधिको व्यवस्था गरिएको भए पनि नियन्त्रण बाहिर गएको उनले बताए ।

लम्पी स्किनबारे सचेतना जगाउँदै सावधानी अपनाउनु नै अहिलेका लागि लम्पी स्किनको जोखिमबाट जोगिन सकिने गुरागाइको भनाइ छ । जिल्लाको कावासोती नगरपालिकामा लम्पी स्किनको सङ्क्रमण दर उच्च रहेको छ भने कावासोतीमा हालसम्म सबैभन्दा बढी एक सय ५१ पशु चौपाया मरेका जनाउँदै डा. गुरागाईंले तीन हजार ७६ पशु लम्पी स्किनबाट सङ्क्रमित भएका जानकारी दिए ।

मध्यविन्दु नगरपालिकामा लम्पी स्किनबाट ९७ पशुको मृत्यु भएको तथा हालसम्म एक हजार एक सय ८० गाईभैँसी सङ्क्रमित भएका उनले बताए । गुरागाईंका अनुसार देवचुली नगरपालिकामा लम्पी स्किनबाट हालसम्म ८० गाईभैँसीको मृत्यु हुँदा सात सय ११ सङ्क्रमित भएका छन् ।

यसैगरी विनयी त्रिवेणी गाउँपालिकामा दुई हजार एक सय ९० गाईभैँसी सङ्क्रमित तथा २२ को मृत्यु भएको बताए । बौदिकाली गाउँपालिका दूई सय ५४ गाईभैँसीमा लम्पी स्किनको सङ्क्रण देखिएको उल्लेख गर्दै पशु चिकित्सक गुरागाईंले ३६ गाईभैँसीको मृत्यु भएको बताए ।

गैंडाकोट नगरपालिकामा लम्पी स्किनबाट २१ गाईभैँसीको मृत्यु हुनुका साथै छ सय ४३ सङ्क्रमित, हुप्सेकोट गाउँपालिकामा २४ पशुको मृत्यु तथा तीन सय ३१ सङ्क्रमित एवं बुङिलटार गाउँपालिकामा १५ गाईभैँसीको मृत्यु तथा एक सय २२ सङ्क्रमित भएका छन् ।

भेटेरीनरी अस्पताल तथा पशुसेवा विज्ञ केन्द्रले जिल्लाका आठवटै स्थानीय तहमा लम्पी स्किन रोगविरुद्धको खोप वितरण गरेको छ । लम्पी स्किन रोग न्यूनीकरण एवं रोकथामका लागि छ हजार भ्याक्सिन खरिद गरेर स्थानीय तहमा पठाइएको कार्यालय प्रमुख पशु चिकित्सक डा. गुरागाईंले जानकारी दिएका छन् ।

सङ्क्रमण थप फैलन नदिन भन्दै जिल्लाका देवचुली, गैँडाकोट र कावासोती नगरपालिका तथा विनयी त्रिवेणी गाउँपालिका आफैँले समेत खोप खरिद गरेर गाईभैँसीलाई लगाएको उनको भनाई छ ।