खोज

दाङ, ७ साउन ।

नेपाल कम्युनिष्ट पार्टीका संस्थापक महासचिव पुष्पलाल श्रेष्ठको ४५औँ स्मृति दिवसको अवसरमा नेकपा एमाले दाङले जिल्लाका विभिन्न स्थानमा कार्यक्रम सम्पन्न गरेको छ । जस अन्तर्गत घोराहीमा पनि कार्यक्रम आयोजना भएको नेकपा एमालेले जनाएको छ । ४५ औँ पुष्पलाल स्मृति दिवसको सन्दर्भमा नेकपा एमाले घोराही नगर कमिटीले आइतबार रक्तदान तथा विचार गोष्ठी गरेको छ ।

पार्टीका केन्द्रीय अनुशासन आयोगका सदस्य छविलाल वलीले जिल्लास्थित पार्टी कार्यालयमा भएको कार्यक्रममा कम्युनिष्टहरु बीचको वैचारिक वहस पछिल्लो समय कमजोर बन्दै गएकाले यसतर्फ पार्टी नेतृत्व गम्भीर हुनुपर्ने आवश्यकता औँल्याए । देशमा समग्र कम्युनिष्टहरुको बाहुल्यता रहेको बेलामा यसको सही उपयोग देशको विकासमा लगाउन तर्फ ध्यान दिनुपर्ने उनको भनाई थियो ।

सदस्य वलीले विचारको राजनीतिले मात्रै देशमा समाजवाद सम्भव रहेको हुँदा यस विषयमा सरोकार सबै पक्षले पुष्पलालले प्रस्तुत गरेका नीति विचार र सिद्धान्तको अनुशरण अहिले पनि उत्तिकै सान्दर्भिक रहेको चर्चा गरे ।

पछिल्ला दिनमा कम्युनिष्ट आन्दोलनको मूल मर्म बिर्सेर विपरित दिशामा कम्युनिष्टहरु लाग्दै गएको आभाष हुने गरेको हुँदा यस विषयमा सरोकार पक्ष गम्भीर हुनुपर्नेमा उनको जोड थियो । ‘नेपालको इतिहासलाई ऐतिहासिक भौतिकवादी दृष्टिकोणले अध्ययन अन्वेषण गर्न उनको योगदान निकै ठूलो रहेको छ’ उनले भने, ‘नेपाल कम्युनिष्ट आन्दोलनमा पटक पटक कारागार परेका पुस्पलालको सैद्धान्तिक दृढता दूरदर्शिता, सिर्जनशीलता, क्रान्तिकारीता र व्यवहारिक नीति निर्माण भुल्न सकिँदैन । यो कुरा आजको दिनमा उत्तिकै सान्दर्भिक छ ।’

सो अवसरमा, पुष्पपाल र कम्युनिष्ट पार्टीको सान्दर्भिकताका बारेमा गोपाल नेपालीले कार्यपत्र प्रस्तुत गरेका थिए भने उक्त कार्यपत्रको टिप्पणी दुर्गालाल केसीले गरेका थिए । कार्यक्रममा दुई दर्जन बढी नागरिकले रक्तदान गरेका थिए ।

२००६ मा भारतको कोलकतामा नेपाल कम्युनिष्ट पार्टीको स्थापना गर्दा पुष्पलालले सम्मुन्नत राष्ट्र निर्माण गर्ने र नेपाली जनताको वास्तविक मुक्तिको कार्यभार पूरा गर्ने लक्ष्य राखेका थिए । वि.सं १९८१ असारमा रामेछापको भङ्गेरीमा जन्मिएका पुष्पलाल वैचारिक रूपले सशक्त र आम नेपालीका लागि एक प्रेरणादायी नेताका रूपमा परिचित छन् । जनमतका हिसाबले ठूलो हिस्सा कम्युनिष्ट र वामपन्थी भएपछि विभिन्न टुक्रामा विभक्त हुँदा उनले देखेको सपना पूरा हुन नसकेको गुनासो कायमै छ ।

यसैबीच, पुष्पलाल श्रेष्ठको ४५ औँ स्मृति दिवसको अवसरमा घोराही १४ स्थित नेपाल अपांग संघ खगेन्द्र नवजीवन केन्द्र स्वर्गद्वारी शाखामा बस्दै आएका अपांगता भएकाहरुका लागि नेकपा एमालेले खाद्यान्न सहयोग गरेको छ ।