खोज

बुटवल, ७ साउन  ।  पर्यटन उद्योगका रुपमा परिचित होटल ब्यवसायीहरुको सेवालाई मर्यादित र गुणस्तरीय बनाउने उद्येश्यका साथ रुपन्देही होटल तथा रेष्टुरेन्ट ब्यवसायी संघले तालिमहरु चलाउन थालिएको छ । युवाहरुमाझ आर्कषण रहेको बारिष्ठा तालिम गरेको संघले होटल ब्यवस्थापन सम्बन्धि तालिम शुरु गरेको छ । दिगो तथा सम्मानित रोजगारका लागि सीप परियोजना (ईन्योर) दोस्रो चरण र रुपन्देही उद्योग संघको सहकार्य तथा एशियन स्कुल अफ टुरिजम एण्ड होटल म्यानेजमेन्ट प्रालिको प्राविधिक सहयोगमा ९ दिने निशुल्क होटल ब्यवस्थापन तथा पुर्नताजगी तालिम शुभारम्भ गरिएको हो ।

कार्यक्रमको होटल तथा रेष्टुरेन्ट महासंघ केन्द्रिय सदस्य महेन्द्र श्रेष्ठले उद्घाटन गर्दै पर्यटन क्षेत्रमा नीजि क्षेत्रको लगानी ह्वात्तै बढेको बताए । बजारको माग अनुसार होटललाई ब्यवस्थित र सेवालाई गुणस्तरीय बनाउन नियमित तालिम जरुरी रहने उनले बताए । सिकाई कहिले नसकिने भन्दै उनले तालिमबाट ब्यवसायीहरुको सेवालाई गुणस्तरीय बनाउन मद्यत मिल्ने दाबी गरे ।

कार्यक्रममा रुपन्देही उद्योग संघका अध्यक्ष माधव पौडेलले उद्योगीको हकहितसंगै औधोगिक विकासमा आफुहरु अग्रसर रहेको बताए । उद्योगीहरुलाई उद्यमसिल बनाउन संस्थागत सहकार्यमा धेरै तालिमहरु दिन सफल भएको उनले बताए । अहिलेसम्म वाईरिङ, होटल ब्यवस्थापन, बेल्डिङ तालिम जस्ता युवाहरुको क्षमता अभिवृद्धिका तालिमबाट धेरैले लाभ लिन सफल भएको उनले बताए । प्राविधिक शिक्षा र औधोगिकरण बिना देशको विकास हुन नसक्ने दाबी गर्दै उनले यसमा सरकारको ध्यान जानुपर्ने बताए । ब्यवहारिक र आवश्यकताको आधारमा तालिम दिन जरुरी रहेको उनले बताए । सरकार निजि क्षेत्रसंगको सहकार्यमा नीति बनाउन जरुरी रहेको उनले बताए ।

कार्यक्रममा संघका अध्यक्ष लेखनाथ भण्डारीले निर्वाचित भएर आएसंगै तालिमको अभियानलाई प्राथमिकतामा राखेको बताए । बारिष्ठा, ब्यवस्थापन हुँदै निरन्तरण तालिमलाई जोड्दै जाने उनले बताए । होटलको ब्यवस्थापन तालिम लगत्तै कुक, वेटर, डिक्स वास लगायतका तालिम चलाउने योजना रहेको उनले बताए ।

प्रालिका प्रबन्ध निर्देशक जिएन गुरुङले दक्ष जनशक्ति उत्पादनको लक्ष्यसहित स्थापित संस्थाबाट वर्षेनी धेरै युवाहरु तयार भएको दाबी गरे । दुई दशकमा १० हजार जना भन्दा बढिलाई तालिम दिन सफल भएको उनले बताए । होटल ब्यवस्थापनमा भित्रिएका नया प्रविधि, अतिथि सत्कार, क्वालिटी डेलिभर लगायतका विषयहरुलाई ७ वटा भागमा बाडेर कोर्ष तयार गरिएको छ । दैनिक ५ घण्टाको दरबाट ९ दिनसम्म प्रशिक्षार्थीले तालिममा भागलिने छन ।

तालिमको धेरै माग रहेको भन्दै तालिम तथा शिक्षा संयोजक माधव ढकालले २० जना ब्यवसायीहरुलाई सहभागी गराईएको बताए । वर्षभरि नै निरन्तर पालो गरेर दक्षता अभिवृद्धि र सीप विकासका तालिम चलाउने उनले बताए ।

कार्यक्रममा निवर्तमान अध्यक्ष रामप्रसाद गौतम, वरिष्ठ उपाध्यक्ष माधव खनाल, पर्यटन उपाध्यक्ष रोमाकान्त पाण्डेले समयको माग अनुसार उत्कृष्ट कार्य भएको बताए । दैनिक ५ घण्टाका दरले ९ दिनसम्म चल्ने तालिममा होटल ब्यवस्थापनमा अनुभवी प्रशिक्षक राजेन्द्र पौडेलल् सहजिकरण गर्नेछन ।