खोज

चन्द्रौटा (कपिलवस्तु), ६ साउन ।  खुतखुते सामुदायिक वनले वेतबाँसको सामग्री बनाउने उद्योग सञ्चालन गरेको छ । जिल्लाको बाणगंगा नगरपालिका वडा नम्बर–९ मा रहेको वनले स्थानीय विपन्नलाई उद्यमी बनाउनको लागि उद्योग सञ्चालन गरेका हो । भर्लावास टोलमा ७ लाख ७० हजारको लागतको उपकरण खरिद गरी उद्योग सञ्चालन गरेको वनले जनाएको छ ।
एक वन एक उद्यम विकास कार्यक्रम अन्तर्गत परम्परागत सीपमा आधारित उद्यम सञ्चालन गरेको सामुदायिक वनका अध्यक्ष भीम बहादुर पुनले बताए । उनका अनुसार उद्योगबाट बाँसको चोयाबाट निर्माण हुने डोको, नाङ्लो, डालो, मान्द्रो लगायतका सामाग्री निर्माण हुने छ । बाँसको चोया काट्नका लागि दुई उपकरण खरिद गरिएको जनाइएको छ ।
ती उपकरणले बाँस चिर्ने, बाँसबाट चोया निकाल्न प्रयोग हुने छन् । उपकरण प्रयोग गरी चोया बनाउँदा उत्पादन गर्ने क्षमतामा दोब्बर वृद्धि हुने अध्यक्ष पुन बताउँछन् । उद्योगमा आवश्यक पर्ने बाँस उत्पादनका लागि खोलाका छेउमा बृक्षरोपण गरिनेछ । खोलाको छेउमा बाँस लगाउँदा भूक्षय नियन्त्रण भई नदी कटानबाट जोगिने र उद्योगको लागि कच्चा पदार्थ उत्पादन समेत हुनेछ ।
यस्तै डिभिजनल वन कार्यालय कपिलवस्तुका प्रमुख विजयराज सुवेदीले स्थानीय सिपको संरक्षण गर्दै बिस्तारै लोप हुने लागेका परम्परागत सामग्री निर्माणले विपन्न समुदायको जीवन स्तर उकास्न सकिने हुनाले कार्यालयले सहयोग गरेकोे बताए । वन कार्यालयले २ लाख ३० हजार रूपैयाँ अनुदान स्वरूप प्रदान गरेको समेत जनाइएको छ । उद्योग सञ्चालनबाट ३० विपन्न घरधुरी लाभान्वित हुने छन् ।