खोज

बाके, साउन  बाँकेमा लुम्बिनी प्रदेश सरकारले स्थापना गरेको लुम्बिनी प्राविधिक बिश्वबिद्यालयले स्थापनाको एकवर्षपछि पढाइ शुरु गर्ने भएको छ । पढाइ शुरु गर्ने तयारी गरेको बिश्वबिद्यालयको पूर्वाधार निर्माणको भने कुनै टुङ्गो छैन ।

पछिल्लो एकवर्षमा बिश्वबिद्यालयको पूर्वाधार निर्माणको काम हुन सकेन । पूर्वाधार पनि कुन ठाउँमा निर्माण गर्ने भन्ने यकिन छैन । जहाँ प्रस्ताव गरिएको छ त्यहाँ पनि बिवाद उत्पन्न भएको छ । बिश्वबिद्यालयका उपकुलपति प्राध्यापक डा. बिनोदप्रसाद ढकालले चालु शैक्षिक सत्रबाट संचालन गरिने योजना भएको बताए ।

उपकुलपति ढकालका अनुसार चालु शैक्षिकसत्रबाट ‘बिटेक इन आईटी’,‘बिटेक सिएस एण्ड एआई’, ‘बिटेक इन आईटी इन्जिनियरिङ्ग’ लगायत पाँचवटा शैक्षिक कार्यक्रम संचालन गरिने छ । अर्कोबर्षको शैक्षिकसत्रबाट थप कार्यक्रम संचालन हुने कार्यक्रम रहेको उपकुलपति ढकाल बताउँछन् । उनका अनुसार खजुराको केन्द्रीय क्याम्पसमा इन्जिनियरिङ्ग र सूचना प्रविधि र निकट भविष्यमा दाङ्ग र रूपन्देहीमा कृषि,वन र पर्यटनसँग सम्बन्धित कार्यक्रम संचालन हुने छन् । तर यी कार्यक्रम सन्चालनका लागि पूर्वाधार खोज्न सकस परेको छ ।

लुम्बिनी प्राविधिक बिश्वबिद्यालय बाँकेको खजुरा गाउँपालिका–८ मा प्रस्ताव गरिएको छ । त्यहाँको एक सय बिगाह जग्गा विश्वविद्यालयको नाम गर्ने वा लिजमा दिने भन्ने रायसहित गाउँपालिकाले जिल्ला प्रशासन कार्यालय बाँके मार्फत सरकारसँग अनुमति मागेको छ । उक्त अनुमति हाल नआइसकेले बिश्वबिद्यालयका लागि पछिल्लो एकवर्षमा भौतिक पूर्वाधार निर्माणको काममा सिन्को समेत भाँचिएको छैन ।

जग्गामा स्थानीयले भोगचलन गरेका कारण उक्त समस्या समाधान नगरी पूर्वाधार निर्माणको काम हुने सम्भावना पनि कम छ । नेपाली काँग्रेसका क्षेत्रीय सभापति नक्की खाँले त्यसैको संकेत गर्दै भने,–‘बिश्वबिद्यालयको वर्षदिन पुगेको अवसरमा हामी यता खुसियाली मनाउँदै गर्दा बिश्वविद्यालयलाई दिने भनिएको जग्गामा बर्षांैदेखि भोगचलन गर्दै आएका जनताको मनमा अनेक कुरा खेलिरहेका छन् । यस बिषयमा सरोकारवाला निकायले गम्भीरतापूर्वक साेंच्न जरुरी छ ।’

खजुरा गाउँपालिका अध्यक्ष डम्बर बिक तुफानले जग्गाका बिषयमा कानून बमोजिम सरकारसंग माग गरिएको हुँदा त्यसको निकास चाँडो निस्किनुपर्ने बताएका छन् । उनले हाल जग्गाको संरक्षण आफूहरूले गरिरहेको बताए । विश्वविद्यालय स्थापनाकालमा महत्वपूर्ण भूमिका निर्वाह गरेका खजुरा गाउँपालिकाका निर्वतमान अध्यक्ष किस्मतकुमार कक्षपतिले बर्षदिन पुरा हुँदा पनि पूर्वाधार निर्माणको काममा प्रगति नहुँनु दुःखद कुरा भएको बताउँदै भन्छन्,–‘तत्काल पूर्वाधार निर्माण हुन नसक्ने अबस्था छ भने जनकशिक्षा सामाग्री केन्द्र वा अन्य कुनै बिकल्प खोजेर खजुरामै बिश्वबिद्यालयको कार्यालय राख्नुपर्छ र पढाइ पनि त्यही शुरु गर्नुपर्छ ।’

कक्षपतिले जनकशिक्षा सामाग्री केन्द्रको भवन सबैभन्दा उत्तम बिकल्प भएको बताउँदै त्यसका लागि केन्द्रीय सरकारलाई जसरी पनि मनाउनुपर्ने बताए । ‘त्यो दिन मानिरहेका छैनन् भन्ने सुनेको छु तर विश्वविद्यालयलाई पूर्वाधार सम्पन्न बनाउन लाग्ने हो भने जसरी पनि जनकशिक्षाको भवनलाई उपयोग गर्नुपर्छ’– कक्षपतिले भने । लुम्बिनी प्रदेश विश्वविद्यालयको काम तत्कालिन मुख्यमन्त्री शंकर पोखरेलको पालामा अघि बढेको थियो भने कुलप्रसाद केसीको पालामा राजपत्रमा प्रकाशित भई कार्यान्वयनमा आएको थियो । खजुरामा १ सय बिघा जग्गा उपलब्ध गराउने प्रतिबद्धता अनुसार बाँकेमा विश्वविद्यालय स्थापना भएको कक्षपति बताउँछन् ।