खोज

काठमाण्डौ, ४ साउन ।  नेपाली राष्ट्रिय महिला फुटबल टोलीलाई एक वर्षका लागि युनिलिभर नेपाल लिमिटेडले प्रायोजन गरेको छ । अखिल नेपाल फुटबल संघ (एन्फा) र युनिलिभरका बिच नेपाली महिला फुटबल टोलीका लागि एक वर्षको प्रायोजन सम्बन्धि सम्झौता गरेका हुन् ।

एन्फाका अध्यक्ष पंकजविक्रम नेम्वाङ र युनिलिभर नेपाल लिमिटेडका म्यानेजिङ डाइरेक्टर अमलान मुखर्जीले उक्त सम्झौतापत्रमा हस्ताक्षर गरे । सम्झौताअनुसार युनिलिभरले वार्षिक २५ लाख रुपैयाँ महिला फुटबल टोलीलाई प्रदान गर्नेछ । सो अवसरमा युवा तथा खेलकुदमन्त्री डिगबहादुर लिम्बूले सिमित श्रोत र साधनका बीच पनि नेपाली खेलाडीले देशका लागि धेरै सफलता दिलाएको उल्लेख गर्दै उनीहरूको प्रंसशा गरे । खेलकुद क्षेत्रको विकास र बिस्तारका लागि सरकार लागिपरेको उनले बताए ।

कार्यक्रममा नेपाली महिला फुटबल टोलीकी गोलकिपर तथा कप्तान एञ्जिला तुम्बाप्पो सुब्बाले नेपाली महिला फुटबललाई हौसला बढाउने ब्यवसायिक संस्थाको सहयोग महत्वपूर्ण हुने विश्वास व्यक्त गरे ।

कार्यक्रममा एन्फाका अध्यक्ष नेम्वाङले महिला फुटबल विकासमा सहयोग पु¥याउने उद्देश्यअनुरूप युनिलिभरबाट सहयोग भएको बताए । खेलकुद क्षेत्रको विकास गर्नका लागि एन्फाले रचनात्मक कार्यक्रमलाई जोड दिने समेत उनको दाबी छ ।

कार्यक्रममा युनिलिभर नेपाल लिमिटेडका डाइरेक्टर अमलान मुखर्जीले सन् २०२७ को महिला विश्वकप खेल्ने नेपालको लक्ष्यलाई सहयोग पुग्ने गरि साथ दिएको बताए । यसै हप्तामात्र बंगलादेशसँगको मैत्रीपूर्ण फुटबल सिरिजमा जितेको नेपाली महिला फुटबल टोली आगामी सेप्टेम्बर २३ देखि चीनमा शुरु हुने १९औं एसियाडको तयारी गर्दैछ ।