खोज

रोल्पा, ३ साउन ।   रोल्पामा संघ र प्रदेशबाट प्राप्त पुँजीगत बजेट मध्ये ठूलो हिस्सा खर्च हुन नसकी फिर्ता गएको छ । जिल्लाको पुँजीगत विकासका लागि आएको रकम मध्ये छपन्न करोड पन्ध्र लाख नव्वे हजार रूपैयाँ खर्च हुन नसकेर फिर्ता गएको हो ।

रोल्पामा संघ तर्फका विभिन्न योजनाका लागि ८३ करोड २३ लाख त्रिचालिस हजार र प्रदेश तर्फ विभिन्न योजनाका लागी १ अर्ब ३२ करोड चौरासी लाख अठार हजार गरि कुल दुई अर्ब सोह्र करोड सात लाख एकसठ्ठी हजार बजेट प्राप्त भएको थियो । खर्च हुन नसकेर फिर्ता गएको उक्त रकम कुल बजेटको करिब २६ प्रतिशत हो ।

यसरी प्राप्त भएको वजेट मध्ये संघ तर्फका विभिन्न योजनाका लागि सन्ताउन्न करोड चौहत्तर लाख सतासी हजार र प्रदेश तर्फका विभिन्न योजनाका लागि एक अरव दुई करोड सोह्र लाख त्रियासी हजार गरि कुल एक अरव उनान्साठी करोड एकानव्वे लाख सत्तरी हजार रूपैयाँ खर्च भएको कोष तथा लेखा नियन्त्रण कार्यालय रोल्पाले जानकारी दिएको छ । खर्च हुन नसकेर फिर्ता गएको वजेट मध्ये संघको २५ करोड अठचालिस लाख पचपन्न हजार र प्रदेशको ३० करोड सतसठ्ठी लाख चौतिस हजार रहेको छ ।

जिल्लामा संघ तर्फ पाँच अरव त्रियासी करोड छब्वीस लाख नब्वे हजार र प्रदेश तर्फ उनासी करोड त्रिहत्तर लाख पैतालिस हजार गरि चालु तर्फ छ अर्ब त्रिसठ्ठी करोड पैतिस हजार रूपैयाँ प्राप्त भएको थियो । चालु तर्फ प्राप्त बजेट मध्ये संघको पाँच अर्ब चालिस करोड वाईस लाख नौ हजार र प्रदेश तर्फ वैसठ्ठी करोड चौहत्तर लाख चवालिस हजार गरि कुल छ अर्ब दुइ करोड छयानव्वे लाख चवन्न हजार खर्च भएको कोष तथा लेखा नियन्त्रण कार्यालय रोल्पाका सुचना अधिकारी हेमन्तराज आचार्यले जानकारी दिए ।

घटेन असारे विकासः

जिल्लामा प्राप्त विकास वजेट मध्ये ठूलो हिस्सा असारमा खर्च भएको छ । संघ तर्फ प्राप्त त्रियासी करोड तेइस लाख त्रिचालिस हजार र प्रदेश तर्फ एक अरव वत्तीस करोड चौरासी लाख अठार हजार गरि कुल दुई अर्ब सोह्र करोड सात लाख एकसठ्ठी हजार बजेट प्राप्त भएको थियो ।
सो मध्ये असार महिनामा मात्रै संघको अठार करोड त्रियासी लाख सात हजार र प्रदेशको चौतिस करोड दश लाख अठासी हजार गरि कुल वाउन्न करोड त्रियानव्वे लाख छयानव्वे हजार रूपैयाँ खर्च भएको छ । यो रकम जिल्लामा प्राप्त विकास वजेटको कुल खर्च भएको वजेटको एक तिहाई हो ।

जिल्लामा संघ र प्रदेश दुवै तर्फको वर्षभरि कुल एक अरव उनान्साठी करोड एकानव्वे लाख सत्तरी हजार रूपैयाँ खर्च भएको थियो । विकासको ठूलो हिस्सा खर्च हुन नसक्नु र खर्च भएको वजेट मध्ये ठूलो हिस्सा असार भित्रै खर्च गर्नुले विकासको मात्रा र गुणमा नै प्रश्न उठ्छ पुर्व सांसद लेखनाथ आचार्यले भने । एघार महिनासम्म घाम तापेर वस्ने र असार महिनामा मात्रै हुने कामको चटारोले अनियमितता र भ्रष्टाचारले समेत प्रसय पाउने गरेको पूर्व सांसद आचार्यको भनाई छ ।