खोज

सल्यान, ३ साउन ।

नयाँ आर्थिक वर्ष सुरु भइसक्दा समेत नीति, कार्यक्रम र बजेट ल्याउन नसकेको सल्यानको कुमाख गाउँपालिकामा बहुमत कार्यपालिका सदस्यहरु नै बैठकमा उपस्थित नहुने भएपछि झनै समस्या बल्झिने भएको छ । गाउँपालिका अध्यक्ष र उपाध्यक्षले एक विज्ञप्ती नै जारी गर्दै माओवादी केन्द्रबाट प्रतिनिधित्व गर्ने कार्यपालिका सदस्यहरुका कारण समस्या भएको भन्दै बजेट तथा कार्यक्रमको लागि प्रक्रिया नै अगाडि बढ्न नसकेको प्रष्टीकरण दिएका छन् ।

नेपाली कांग्रेसबाट निर्वाचित गाउँपालिका अध्यक्ष मान बहादुर बुढाथोकी र नेकपा एमालेबाट निर्वाचित उपाध्यक्ष लाल बहादुर रावतले गाउँपालिकाको लेटर प्याडमा संयुक्त रुपमा विज्ञप्ती जारी गर्दै माओवादी केन्द्रका जनप्रतिनिधिका कारण गाउँसभा नै बस्न नसकेको जनाएका हुन् । विभिन्न विषयगत समितिको बैठक, चार पटक बोलाईएको कार्यपालिका बैठक र पालिकाले राखेको सर्वपक्षीय बैठकमा माओवादीबाट प्रतिनिधि गरेका १० जना कार्यपालिका सदस्यहरु सहभागि नभएको विज्ञप्तीमा उल्लेख छ ।

बुहमतको दम्भका कारण गाउँपालिकालाई अनिर्णयको बन्दी बनाइएको भन्दै कुमाखको विकास  निर्माण र प्रशासनिक कार्यमा परेको असरको जिम्मा पनि माओवादीबाट प्रतिनिधित्व गर्ने कार्यपालिका सदस्यले लिनुपर्ने अध्यक्ष र उपाध्यक्षको भनाई छ । माओवादी नेतृत्वसंग बस्दा उनीहरुमा दलगत तथा व्यक्तिगत स्वार्थ बाझिएका शर्तहरु राखेको र कार्यपालिका सदस्यले पनि त्यही शर्तहरु राखेका कारण आफुहरुले विधि र पद्धति वाहिर गएर कानुन विपरित काम गर्न नसकिएको उनीहरुको भनाई छ । गाउँसभाको तयारीका लागि माओवादीबाट प्रतिनिधित्व गर्ने जनप्रतिनिधिसंग सहमति, सहकार्य र सहअस्तित्वको सिद्धान्त अनुरुप सहयोगको आशा राखिएको गाउँपालिका अध्यक्ष, उपाध्यक्षले निकालेको विज्ञप्तीमा उल्लेख छ ।

यसैबीच माओवादी केन्द्रले भने गाउँपालिकाले झुटको खेति गरिरहेकाले यसको खण्डन विज्ञप्ती मार्फत नै गर्ने जनाएको छ । नेकपा माओवादी केन्द्रका कुमाख गाउँपालिका कमिटी अध्यक्ष डिल्लीराज जैसीले गाउँपालिका नेतृत्वको कमजोरीको कारण समस्या आएको बताए । गएको स्थानीय तह निर्वाचनमा एमाले र काग्रेसले गरेको गठबन्धनले अपरिपक्व तरिकारले सरकार चलाउन खोज्दा कुमाखमा समस्या देखा परेको उनको आरोप छ ।