खोज

दाङ, १ साउन ।

घोराही उपमहानगरपालिकालाई पूर्ण खोप सुनिश्चित तथा दिगोपन घोषणा गरिएको छ । विभिन्न १३ प्रकारका खोप लगाएको सुनिश्चित भएपछि आइतबार एक समारोह बीच पालिकालाई पूर्ण खोप सुनिश्चित तथा दिगोपन घोषणा गरिएको हो ।

सो अवसरमा पालिकालाई पूर्ण खोप सुनिश्चित घोषणा भएको प्रमाण पत्र जिल्ला खोप समन्वय समिति संयोजक एवम् जिल्ला समन्वय समिति दाङका प्रमुख नित्यानन्द शर्माले नगर प्रमुख नरुलाल चौधरीलाई प्रदान गरेका थिए । घोराहीमा १५ महिनामुनिका ४ हजार ४ सय ३१ जना बालबालिकाले खोप लगाएको तथ्यांक छ । यस्तै पालिकाको १९ वटै वडाका १६ देखि ५९ महिनासम्मका १० हजार २ सय ६७ जना बालबालिकाले खोप लगाएका छन् ।

यद्यपि, अहिले पनि १५ महिनामुनिका शून्य डोज खोपका बालबालिका ७ जना रहेको पाइएको छ । वडा नम्बर १८ मा ३ जना र वडा नम्बर १४ मा ४ जना बालबालिकाले एउटा पनि खोप नलगाएको भेटिएको छ । खासगरी बजार क्षेत्रमा डेरा गरी बस्दै आएका अभिभावकहरुबाट लापरबाही हुँदा शून्य डोज खोपको संख्या देखिएको घोराही स्वास्थ्य शाखा प्रमुख नारायणप्रसाद घर्तीले बताए । १६ देखि ५९ महिनासम्मका शून्य डोज खोपका बालबालिका २४ जना रहेका छन् ।

यसैगरी, खोप लगाउने बालबालिकामा १५ महिना मुनिका ड्रप आउट संख्या ६ जना र १६ देखि ५९ महिनासम्मका ड्रप आउट १ सय ७१ जना देखिएको छ ।

कार्यक्रममा जिसस प्रमुख शर्माले पालिकालाई शून्य डोज खोपको संख्यालाई शुन्यमा झार्न सबै सरोकारवाला गम्भीरतापूर्वक लाग्नुपर्ने बताए । यसका लागि मानव र सामाजिक विकासका बारेमा वडातहमा अभियान चलाउन शर्माले आग्रह गरेका छन् । कार्यक्रममा स्वास्थ्य कार्यालय दाङका निमित्त प्रमुख डम्बर कुँवरले अभिभावकले खोपमा चासो नदिँदा लक्ष्यमा पुग्न गाह्रो भएको बताए ।

यसअघि जिल्लाको राप्ती, लमही, गढवा, बंगलाचुली, तुलसीपुर, दंगीशरण, बबईलाई पूर्ण खोप सुनिश्चित तथा दिगोपन घोषणा गरिसकिएको छ । अब जिल्लाको शान्तिनगर र राजपुर गाउँपालिका पूर्ण खोप सुनिश्चित हुन बाँकी छ । पालिकालाई हरेक वर्ष यसरी नै पूर्ण खोप सुनिश्चित गरिने गरिएको छ । खोप नलगाएकै कारण कोही पनि बालबालिका कुनै प्रकारको रोगको शिकार हुन नपरोस् तथा हरेक व्यक्ति आधारभुत खोप सेवा पाउनबाट वन्चित नहोउन् भन्ने लक्ष्यका साथ नेपाल सरकारले यो अभियानलाई निरन्तरता दिदै आएको छ ।