खोज

बुटवल, १ साउन ।

एक वर्षअघि आजकै दिन तिलोत्तमा नगरपालिका वडा नम्बर ४ का वडाअध्यक्ष हरिबहादुर क्षेत्रीलाई बुटवलका डीएसपी ठगबहादुर केसीले पोखरीमा चोवले । रूपन्देहीको तिलोत्तमा नगरपालिकाका जनप्रतिनिधि र प्रमुख प्रशासकीय अधिकृतका बीचमा विवाद भईरेका बेला प्रहरी टोली लिएर पुगेका तत्कालीन डिएसपी केसीले वडाअध्यक्षलाई लात्तले हानेर पोखरीमा खसालिदिएका थिए । तर समय बलवान छ भने झैं तत्कालीन गृहमन्त्री यतिबेला नक्कली भुटानी शरणार्थी प्रकरणमा थुनामा छन् भने तत्कालीन डीएसपी केसी सुन घुस प्रकरणमा निलम्बनमा छन् ।

पोखरीमा चोवलिएका वडाअध्यक्ष क्षेत्री भने वडाकै योजना र काममा खटिरहेका छन् । एक वर्षअघि नगरसभाको विषयमा एमाले र नेपाली कांग्रेसबाट निर्वाचित जनप्रतिनिधिबीच विवाद उत्पन्न भई सभा अवरुद्ध हुँदै आएको थियो । नेपाली कांग्रेसबाट निर्वाचित नगरप्रमुख रामकृष्ण खाण र अरू जनप्रतिनिधिले नगरसभाबाट बजेट मात्रै पास गर्ने र एमालेबाट निर्वाचित उपप्रमुख र अरू जनप्रतिनिधिले बजेटसँगै न्यायिक समिति, लेखा समिति, विधायन समिति र सुशासन समिति समेत गठन गर्नुपर्ने अडान लिदा विवाद बढेको थियो ।
सोही विवादपछि झडप हुन नदिन प्रहरी पुगेको थियो । सोही क्रममा बैठकमा आफूहरूलाई उपस्थिति पुस्तिकामा हस्ताक्षर गर्न रोक लगाएको भन्दै आक्रोशित बनेका एमालेका जनप्रतिनिधिले प्रमुख प्रशासकीय अधिकृत जीवन ज्ञवालीलाई घेरा हाली नियन्त्रणमा लिन खोजेका थिए । त्यसपछि उद्धारका खटिएको प्रहरीले जनप्रतिनिधिहरुलाई हस्तक्षेप गरेको थियो ।

नगरसभास्थलमा जिल्ला प्रहरी कार्यालय रूपन्देहीका प्रमुख प्रहरी उपरीक्षक रवीन्द्र रेग्मी र इलाका प्रहरी कार्यालय बुटवलका प्रमुख प्रहरी नायब उपरीक्षक ठगबहादुर केसी सहितको टोली खटिएको थियो । प्रशासकीय अधिकृत ज्ञवालीको उद्दारका क्रममा प्रहरीले जनप्रतिनिधिलाई हातपात गरेको थियो । तिलोत्तमा नगरपालिका वडा नंं ४ का वडाध्यक्ष हरिबहादुर क्षेत्रीलाई इलाका प्रहरी कार्यालय बुटवलका प्रमुख प्रहरी नायब उपरीक्षक ठगबहादुर केसीले नगरसभा भइरहेको होटलको स्वीमिङ पुलमा खसालिदिएका थिए ।

प्रहरी नायब उपरीक्षक केसीले लछारपछार गर्दै आफूलाई स्वीमिङ पुलमा फालिदिएको वडा अध्यक्ष क्षेत्रीले स्मरण गरे । एमालेका जनप्रतिनिधिले दोषी प्रहरी अधिकारीमाथि कार्बाहीको माग गरेपछि छानविन समेत गरिएको थियो । यो प्रकरणलाई स्मरण गर्दै एमाले नेता मोहन चापागाईंले आफ्नो पूरानो स्टाटस शेयर गर्दै सामाजिक सञ्जाल फेसबुकमा लेखेका छन्–“समयले एक बर्षमा ३६५ दिन, ८ हजार ७६० घण्टा, ५२ हजार ५६ सय मिनेट र ३ करोड १५ लाख ३६ हजार सेकेण्ड पार गरेको छ । सबैले बुझेका छौ, समय नै सबैभन्दा बलवान छ ।”

२०७८ कात्तिकमा इलाका प्रहरी कार्यालय बुटवलमा कार्यरत प्रहरी नायब उपरीक्षक (डीएसपी) मदन कुँवर रुपन्देहीको सर्वोत्कृष्ट प्रहरी भन्दै पुरस्कृत भएका थिए । कुँवरलाई प्रतिस्थापन गरेर काजमा आएका थिए, डीएसपी ठगबहादुर केसी । विवादित विगत भएका केसी घुससहित पक्राउ परे । शक्तिको आडमा बारम्बार कारबाहीबाट जोगिंदै आएका डीएसपी केसीलाई नगद र चेक सहित केन्द्रीय अनुसन्धान ब्यूरो (सीआईबी)को टोलीले पक्राउ गरेको थियो । सीआईबी प्रमुख प्रहरी अतिरिक्त महानिरीक्षक (एआईजी) उत्तमराज सुवेदीले केसीको साथबाट नौ लाख ५० हजार रुपैयाँको चेक र साढे आठ लाख रुपैयाँ नगद बरामद भएको पुष्टि त्यतिबेला गरेका थिए ।

केसी जिल्ला प्रहरी कार्यालय कास्कीमा सरुवा भएपछि रमाना बुझ्ने तयारीमा थिए । डीएसपी केसीले बुटवलका सुन व्यापारी खिलेन्द्र जिसीको ३५ तोला सुन नियन्त्रणमा लिएर छोड्नका लागि घूस मागेको एआईजी सुवेदीले बताएका थिए ।

६ महिने निलमबन सकिएसँगै डीएसपी केसीलाई प्रहरी प्रधान कार्यालयले जागिरबाटै हटाउन गृहमन्त्रालयलाई पत्र पठाएपनि गृहले फाइल अगाडि बढाएको छैन । “प्रहरी प्रधान कार्यालयले सेवाबाट हटाउनका लागि गृहलाई पत्र पठाएको हो”–केन्द्रीय प्रहरी प्रवक्ता प्रहरी नायब महानिरीक्षक कुवेर कडायतले न्युज बुटवल टुडेसँग भने–“गृहमा फाइल पुगेर रोकिएको होला ।” उनले यो विषयमा अख्तियारले छानविन गरिरहेको जानकारी दिए ।