खोज

गुल्मी, २९ असार ।   जलस्रोत तथा सिँचाइ विकास डिभिजन कार्यालय गुल्मीको सहयोगमा गुल्मीको गुल्मीदरबार गाउँपालिका–६ अन्तर्गत कुमालटारी सिँचाइ योजना अन्तर्गत नहर निर्माण भएपछि यतिबेला त्यहाँका किसानहरूमा खुसि थपिएको छ । जलस्रोत तथा सिँचाइ विकास डिभिजन कार्यालय गुल्मीको आर्थिक सहयोगमा बावुल पन्थ वेष्टर्न पपुलर जेभिले उक्त ठाउँमा छ हजार छ सय ५० मिटर लामो नहर निर्माण गरेको छ ।

एक सय हेक्टर क्षेत्रफलको जमिनमा सिँचाइको सुबिधा पुर्याउनको लागि स्थानीय जाबुने खोलाबाट छ हजार छ सय ५० मिटर लामो नहर निर्माण गरिएको जलस्रोत तथा सिँचाइ विकास डिभिजन कार्यालय गुल्मीका प्रमुख भरतप्रसाद सापकोटाले जानकारी दिए । उनले एक सय हेक्टर क्षेत्रफलमा सिंचाइको सुबिधा पुगेकोले अब जग्गामा खेतीपाती गरेर हराभरा बनाउन सबै उपभोक्तालाई आग्रह गरे ।

२०७९ बैशाख ८ गते जलस्रोत तथा सिँचाइ विकास डिभिजन कार्यालय गुल्मीको सहयोगमा बावुल पन्थ वेष्टर्न पपुलर जेभिबीच कुल एक करोड ७१ लाख रूपैयाँमा योजनाको निर्माण कार्य सम्पन्न भएको थियो । उक्त योजना सम्पन्न गर्ने मिति भन्दा झण्डै पाँच महिना अवागै निर्माण कार्य सम्पन्न गरिएको थियो । निर्माण व्यवसायी केसीले आफूले प्रतिबद्धता जनाए अनुरूप समयमै काम सम्पन्न गरेको बताए । उनले बाँझो रहेको जमिनमा यो सिजनमा सिंचाइ हुनेगरि उपभोक्ताको हितलाई मध्यनजर गरेर तिव्र गतिमा काम सम्पन्न गरेको बताए ।

जलस्रोत तथा सिँचाइ विकास डिभिजन कार्यालयले एक कार्यक्रमका बीच गुल्मीदरबार गाउँपालिकालाई योजना हस्तान्तरण गरेको थियो ।गाउँपालिकाले उपभोक्तालाई संरक्षण गर्ने गरि उपयोग गर्न आग्रह गरेको छ । जलस्रोत तथा सिंचाइ विकास डिभिजन कार्यालय गुल्मीका प्रमुख भरतप्रसाद सापकोटाले आफूहरूले छोटो समयमै ठूलो बजेटको काम सम्पन्न गरेको कुमालटारी सिँचाइ योजना रहेको बताए । उनले निर्माण व्यवसायीबाट पनि समयमै गुणस्तरीय काम भएको बताएका थिए ।

गुल्मीदरबार गाउँपालिकाका अध्यक्ष सरोज कुमार थापाले सिँचाइको सुविधापछि अब त्यस क्षेत्रको जमिन बाँझो नराख्न उपभोक्तालाई आग्रह गरे । ‘सिँचाइ सुविधाको व्यवस्था गरेका छौं’ अध्यक्ष थापाले भने, ‘बाँझो जमिनमा खेती गर्ने र नहरको संरक्षण गर्ने उपभोक्ताको जिम्मेवारी हो ।’—उनले भने । जिल्ला समन्वय समिति प्रमुख द्रोण बहादुर खत्रीले समय अवागै योजनाको निर्माण सम्पन्न गर्ने निर्माण व्यवसायी, रेखदेख गर्ने सिंचाइ कार्यालय, सुविधा लिने उपभोक्ता र समन्वय गर्ने गाउँपालिकालाई धन्यवाद दिए । ‘सिँचाइ नै नभएर जग्गा खाली रहे हाम्रो चिन्ताको बिषय हो’ —जिसस प्रमुख खत्रीले भने ।