खोज

कपिलवस्तु,  २८ असार   कपिलवस्तु जिल्लाको यशोधरा गाउँपालिका र मायादेवी गाउँपालिकामा युनाईटेड मिसन टु नेपाल (युएमएन) को साझेदारीमा कार्यान्वयनमा ल्याईएका परियोजनामा दोहोरोपना आउन नदिन सुझाव दिईएको छ । युएमएनको आयोजनामा तौलिहवामा सम्पन्न जिल्ला परियोजना सल्लाहकार समितीको बैठकले सो सुझाव दिएको हो ।

जिल्ला समन्वय समिति कपिलवस्तुका अध्यक्ष बाबुराम आचार्यको अध्यक्षतामा सम्पन्न बैठकले परियोजनाका कार्यक्रम छनौट र कार्यान्वयन गर्दा लाभग्राहीमा दोहोरोपन आउन नदिने, सरकारी निकायले उपलब्ध गराउने श्रोत बारे समन्वय गर्ने र मानसिक स्वास्थ्य परियोजनालाई मायादेवी गाउँपालिका मात्रै नभई अन्य पालिकामा बिस्तार गर्न सुझाव दिईएको हो । समितिले गरेको अनुगमनमा जिविकोपार्जन सुधारको कार्यक्रम कार्य क्षेत्रमा प्रभावकारी कार्यान्वयन भएको भेटिएको जनाए । सदरमुकाम दक्षिणका क्षेत्रमा वैकल्पिक उर्जाका लागि गोबर ग्यासको प्रबद्र्धन गर्न लाग्नु पर्ने उनले सुझाव दिए । आफुले पछिल्लो समय जिल्लाको कृष्णनगर नगरपालिका र महाराजगंज नगरपालिकाको बिकास सुचकांकलाई मध्य नजर गरि .कार्यक्रम कार्यान्वयन गर्न सुझाव दिने गरेको प्रमुख आचार्यले प्रष्ट्याए ।

सो अवसरमा युएमएनका जिल्ला कलस्टर टिम लिडर रुप कुमार बिकले सनसाईन सामाजिक बिकास संस्था र दलित सामाजिक बिकास केन्द्रको साझेदारीमा जिल्लाको दुई पालिकामा ६ वटा परियोजना कार्यान्वयन गरिएको जानकारी दिए । उनले सेक्योर परियोजना अन्र्तगत जिविकोपार्जन सुधारका कार्यलाई बढावा दिएको र सिवाईसिसी परियोजना अन्र्तगत मायादेवीका २३ बिद्यालयका १ सय ४ कक्षा कोठामा सामाग्री उपलब्ध गराई बालमैत्री बनाउन भुमिका खेलिएको जनाए । त्यसै गरि ति कार्य क्षेत्रमा स्वास्थ्य पुर्नस्थापना कार्यक्रम, अपाङ्गता भएका बालबालिकाको सामाजिक र उपचारमा प्राथमिकता कार्यक्रम, शान्तिको लागि स्थानिय क्षमता परियोजना र मानसिक स्वास्थ्य परियोजना सञ्चालन हुदै आएको बताए ।

कार्यक्रम सञ्चालनमा लाभग्राही छनौटमा दोहोरोपन आउन दिन नहुने समन्वय समितिका उपप्रमुख रमेश कुर्मीले सुझाव दिए । जिल्ला शिक्षा समन्वय ईकाईका प्रमुख थानेश्वर घिमिरेले बैदेशिक रोजगारीले मानसिक स्वास्थ्यमा समस्या बढाएकोले कार्यक्रम सो बिषयमा केन्द्रित गर्नु पर्ने बताए । पुर्वाधार बिकास भन्दा पनि शिक्षामा लगानीले प्राथमिकता पाउनु पर्नेमा मायादेवी गाउँपालिकाका प्रमुख प्रशासकिय अधिकृत परमेश्वर यादवको जोड थियो । पशु बिज्ञ केन्द्रका प्रमुख बिष्णु प्रसाद खनाल, गैसस महासंघ जिल्ला अध्यक्ष जयप्रकाश पाण्डेय, दलित सामाजिक बिकास केन्द्रका कार्यकारी निर्देशक रामशरन रैदास, सनसाईनका अध्यक्ष शिवलाल यादव, युएमएनका मेल्सन श्रेष्ठ लगायतले सेवा प्रवाहलाई प्रभावकारी बनाउन जिल्लास्तरको सहकार्य बृद्धि गर्नु पर्ने सुझाव दिए ।