खोज

सल्यान, २६ असार ।  सल्यान कपुरकोट क्षेत्रका किसानहरूलाई हिजोआज ताजा तरकारी तथा फलफूल स्याहार गर्न, टिप्न र बिक्री गर्न भ्याइनभ्याई छ । वेमौसमी तरकारी खेतिका लागि देश बिदेशमा ख्याति कमाउन सफल यस क्षेत्रमा बार्षिक करोडौं रूपैयाँ भित्रने गरेको छ । कपुरकोट गाउँपालिका जिल्लाको तरकारी पकेट क्षेत्र हो ।

कहिलेकाही उचित मूल्य नपाउँदा मारमा पर्नेगरेका यहाँका किसानले बेला बेला तरकारीमा विचौलियाको कारण पनि हैरानी व्यहोर्नुपरेको गुनासो गर्छन् । तर पनि ताजा तरकारी र फलफुल खेतीबाट लाखौं रूपैयाँ हात पर्ने गरेका छन् ।

२६ दिनको अवधिमा मात्रै कपुरकोट क्षेत्रका किसानले तरकारी बिक्रीबाट पौने ६ करोड बढि रकम हात पारेका छन् । यहि असार १ गते शुक्रवारदेखि कपुरकोटमा तरकारी हाटबजार लागेको थियो । असार १ गते शुक्रबार देखि असार २६ गते मंगलबार सम्म पाँच करोड ८८ लाख ३२ हजार ३६० रूपैयाँ बराबरको तरकारी विभिन्न शहर बजारका व्यापारीले खरिद गरेर लगेको कृषि उपज बजार संचालक समिती कपुरकोटले जनाएको छ ।
यहाँ उत्पादन हुने ताजा तरकारी तथा फलफूल बुटवल, नेपालगञ्ज, धनगडी, कृष्णनगर, घोराही, तुलसीपुर लगायत विभिन्न जिल्लामा निर्यात हुँदै आएको बजार संचालक समितिका अध्यक्ष टंक परियारले जानकारी दिए । पछिल्लो समय यहाँका किसान व्यावसायिक तरकारी खेतीमा लागेपछि व्यापारीलाई खेतबारीमै पुगेर तरकारी खरिद गर्न सजिलो भएको उनले बताए ।

बजार केन्द्रका अनुसार बेमौसमी तरकारीको यो सिजनको २६ दिनको अवधिमा १९ लाख २४ हजार २१७ किलो तरकारी र फलफुल कपुरकोटबाट निर्यात भएको छ । १९ लाख १९ हजार ५१७ किलो ताजा तरकारी, दुई हजार सातसय किलो फलफूल र दुई हजार किलो अदुवा बिक्री भएको कृषि उपज बजार केन्द्रका बजार प्रतिनिधि चन्द्रमणी खड्काले जानकारी दिए ।

यस क्षेत्रका किसानहरूले विशेष गरि गोलभेडा, बन्दागोभी, फूलगोभी, घ्यूसिमी, बोडी, खुर्सानि, आलु, काँक्रो, स्कूस, मूला, गाजर, हरियो साग, भान्टा, हरियो केराउ आदि वेमौषमी ताजा तरकारि उत्पादन गर्ने गर्दछन् । फलफूलहरूमा सुन्तला, आरु, नास्पति, आरु बखडा, अनार, आँप, केरा आदि र मसलादार तरकारीहरूमा अदुवा, हरियो धनिया, प्याज, लसुन, खुर्सानी, टिमुर आदि उत्पादन गर्ने गरेका छन् ।
यस सिजनमा तरकारी हाटबजारबाट सरदर सिमि प्रतिकिलो १२० रूपैयाँ, टमाटर ६०, भेडे खुर्सानी ६५, काउली ६५, बन्दा ९, कांक्रा २५, पिरो खुर्सानी ९५ र अदुवा २०० रूपैयाँमा बिक्रि भएको बजार प्रतिनिधि खड्काले जानकारी दिए ।

मंगलबारको तरकारी हाटबजारमा पनि किसानले प्राप्त गरेको तरकारीको मूल्य निरासाजनक थिएन । बजार केन्द्रका अनुसार किसानले टमाटर प्रतिकीलो ४५ देखि ५०, भेडे ६५ देखि ७०, सिमि १५० देखि १५५, खुर्सानी १३० देखि १६०, लोकल कांक्रा ६० देखि ७०, काउली ७० देखि ७५ र बन्दा ८ देखि १० रूपैयाँमा बिक्रि गरेका छन् । विशेष गरि फागुन देखि यहाँका किसानहरूले तरकारी खेती सुरु गर्छन् । समुन्द्री सतहबाट १२ सय मिटर देखि करिव १८ सय मिटर सम्मको उचाइमा रहेका यहाँका खेतबारीमा किसानहरूले वेमौषमी ताजा तरकारी तथा फलफूल उत्पादन गर्दै आइरहेका छन् ।