खोज

करिव ११५ बर्षको इतिहास बोकेको बुटवलको लुम्बिनी प्रादेशिक अस्पताल लुम्बिनी प्रदेशकै आस्था र विश्वासको धरोहर हो । पछिल्लोसमय प्रदेश सरकारले यो अस्पताललाई प्रदेशकै गौरवको आयोजनाको रूपमा अघि बढाउँदै पूर्वाधार निर्माणका क्षेत्रमा धेरै सुधारका काम गर्दै आएको छ । यो अस्पतालप्रति लुम्बिनी प्रदेशका हजारौं विरामीहरूको आस्था छ । त्यही भएर दैनिक एकजार पाँचसय बढी विरामीले सेवा लिईरहेका छन । अस्पतालको सेवा विस्तार हुँदैगर्दा सेवाकै बिषयमा भने सेवाग्राहीको उत्तिकै गुनासो छ ।

पछिल्लोसमय अस्पतालले सेवालाई विश्वसनीय बनाउने प्रयास गरेको छ तर अस्पतालप्रति अझैपनि सेवाग्राहीको गुनासो कम भन्दा झनै बढ्दो छ । अहिलेको अवस्थामा विरामीले गुणस्तरीय सेवा चाहन्छन तर अस्पतालमा उही पुरानै प्रवृत्तिको समस्या देखिने गरेको गुनासो छ । चिकित्सकीय सेवाको गुनासोमाथि अस्पतालभित्र जाँदा बाहिरै देखिने फोहरजन्य समस्याले अस्पताललाई गिज्याईरहेको छ । सामान्य बिषयमा ध्यान दिने हो भने सुधारका धेरै गुञ्जाईस छन । जस्तो अस्पतालको शौचालयको सुधारका लागि धेरै बजेट आवश्यक पर्दैन ।

शौचालयभित्र जान सकिने अवस्था छैन । धेरै शौचालयमा पानीको प्रवन्ध छैन । हामीले सामान्य शौचालयसमेत सफा राख्न सक्दैनौं भने अरू धेरै कुराको अपेक्षा कसरी गर्ने ? केही महिना अघि उपभोक्ता हित संरक्षण मञ्च रूपन्देहीले यस बिषयमा अस्पताल प्रशासनको ध्यानाकर्षण गराएको थियो तर अझै सुधार हुन सकेको छैन । पछिल्लोपटक भने अस्पतालको सिटी मेसिनबाट विकिरण चुहावट भएको सार्वजनिक भएपछि आम सेवाग्राहीको स्वास्थ्यमा यसले पार्ने असरका बिषयमा चिन्ता थपिएको छ । सिटी मेसिन राख्ने स्थानको पूर्वाधार निर्माणमा लापरवाही गर्दा विकिरण लिक भएको चिकित्सकहरूको दाबी छ । अस्पतालमा आउने सयौं विरामीको स्वास्थ्यमा असर पर्ने यो गभीर बिषयमा यति धेरै लापरवाही किन ? अस्पताल प्रशासनले जवाफ दिनुपर्दछ । अस्पतालकै चिकित्सकहरूले यस बिषयमा पटकपटक अस्पताल प्रशासनको ध्यानाकर्षण गराईएको बताएपनि मर्मतमा ढिलासुस्ती हुनु विरामीको स्वास्थ्यमाथिकै लापरवाही हो भन्दा अत्युक्ति हुँदैन ।

अस्पतालमा सिटी सेवा सुरु गर्दा एउटा मुख्य ढोकामा दुई एमएमभन्दा मोटो लिडको च्यादर राखिएको भएपनि पछिल्लो समय पश्चिमतर्फ नयाँ ढोका बनाउँदा कमसल च्यादरको प्रयोग भएकोले समस्या आएको बताइएको छ । नयाँ ढोकामा डेढ एमएमभन्दा पातलो लिडको प्रयोग गरिंदा विकिरण चुहावट भएर बिरामी कुरुवा र चिकित्सकहरूको कक्षभन्दा बाहिरसम्म आएको छ । यो लापरवाही नभएर के हो ? अस्पतालकै मर्मत इन्चार्जले नयाँ ढोकामा डेढ एमएमभन्दा पातलो लिडको च्यादर प्रयोग भएकोे समस्या देखिएको स्वीकार गरेका छन ।

गलत काम भएको रहेछ भन्ने यो ज्वलन्त प्रमाण हो । नाङ्गो आँखाले देख्न नसकिने हँुदा सामान्य बिरामीहरू यसबारे अनभिज्ञ रहेका छन । अस्पतालका चिकित्सकहरूले यसबारे प्रशासनलाई जानकारी गराएको भएपनि मर्मतमा ध्यान नदिएको गुनासो उनीहरूको छ । ढिलै भएपनि अस्पताल प्रशासनको यो बिषयमा ध्यानाकर्षण होस् । अस्पतालमा सेवा लिन आउने विरामी मात्रै होइन, चिकित्सकहरूले प्रयोग गर्ने शौचालयमा पानी नआउने, दुर्गन्धित र नियमित सफा नगर्ने समस्याप्रति अस्पताल प्रशासनको ध्यानाकर्षण होस् ।

अस्पताल प्रशासनले आर्थिक समस्या देखाएर यो बिषयलाई नजरअन्दाज गर्नुहुँदैन । अस्पतालले तत्काल समाधान गर्न सकिने बिषयमा ढिलासुस्ती गर्दा सेवाग्राहीको स्वास्थ्यमै असर पुग्नु चाहिँ राम्रो होइन । आशा गरौं हालैमात्र अस्पतालले नयाँ सञ्चालक समिति पाएको छ । नयाँ नेतृत्व सहितको सञ्चालक समितिले सेवाग्राहीका गुनासो तत्काल समाधान गर्नेतर्फ पहल गरोस् । यो अस्पताललाई जसरी प्रदेश सरकारले लुम्बिनी प्रदेशकै गौरवको अस्पताल बनाउने प्रतिवद्धता गरेको छ, त्यसमा अस्पताल प्रशासन र सञ्चालक समितिको नयाँ नेतृत्वले होस्टेमा हैंसे गरोस् । सेवाग्राहीका गुनासो कम हुँदै जाउन् । हामी सवै मिलेर अस्पताललाई ब्युँझाउने प्रयास गरौं ।