खोज

बुटवल, २५ असार      ‘मानवअधिकार, शान्ति, लोकतन्त्र र अहिंसा तथा छुवाछूत मानवता विरुद्धको अपराध हो’ भन्ने मुलनाराका साथ स्थापित भएको मानवअधिकार तथा शान्ति समाज रुपन्देहीले बुटवलमा प्रदर्शन गरेको छ । समाजले दलित समुदायमाथि भईरहेको उत्पीडन र अत्याचारका विरुद्ध इलाका प्रशासन कार्यालय बुटवल अगाडि प्लेकार्डसहित प्रर्दशन गरेको हो । ‘बदलित अधिकार मानवअधिकार, जातीय विभेदका घटनामा दोशीलाई कारवाही गर, दण्डहिनताको अन्त्य गर, दलित समुदायमा भईरहेको अत्याचार तुरुन्त बन्द गर’ भन्ने जस्ता नारा लेखिएको प्लेकार्डसहित सचेतना तथा प्रदर्शन गरेको हो ।

कार्यक्रममा मानवअधिकार तथा शान्ति समाजका पूर्व केन्द्रीय सभापति तथा सल्लाहकार गोविन्द खनालले बोल्दै नेपालमा दलित अधिकार मानवअधिकार भन्ने एजेण्डालाई स्थापित गर्न शान्ति समाजले महत्वपूर्ण भूमिका निर्वाह गरेको बताए । २०६८ मा जातीय छुवाछुत विरुद्धको ऐन बनाएर राज्यले कानूनीरूपमा दण्डनीय भनेपनि व्यवहारमा यसको कार्यान्वयन नभएको बताए । उनले सबै प्रकारका विभेदको अन्त्यका गर्न दलित आन्दोलन र मानवअधिकारको आन्दोलन, न्यायको आन्दोलन र समतामुलक समाज निर्माणमा गैरदलितको पनि साथ र सहयोगको आवश्यकता रहेको बताए ।

त्यस्तै गरी शान्ति समाजका पूर्व सभापति कृष्ण पराजुली,केन्द्रीय सदस्य डीपी खनाल, टे«ड युनियन काङ्ग्रेस लुम्बिनी प्रदेश अध्यक्ष काजीमान श्रेष्ठ, ट्रेड युनियन कांग्रेस रूपन्देहीका वरिष्ठ उपाध्यक्ष सफातुल्ला रजा, नेपाल पत्रकार महासंघ रूपन्देहीका कोषाध्यक्ष सन्जय बिक, नेपाल प्रेस युनियनका केन्द्रीय सदस्य फुलमाया सुनार, राष्ट्रिय दलित पत्रकार संघ नेपाल रूपन्देहीका अध्यक्ष टंक सुनार लगायतले बोल्दै जातीय विभेदको अन्त्यमा सरकारले चासो नदेखाएको र अपराधजन्य घटनाले प्रशय पाईरहेको बताउँदै यसको अन्त्यका लागि सबैको सहकार्य हुनुपर्नेमा जोड दिए ।

शान्ति समाज रूपन्देहीका सभापति कृष्ण प्रसाद भट्टराईले बोल्दै २१ औं शताब्दीमा पनि मानवले मानव भएर बाच्न पाउनुपर्ने अधिकारबाट बञ्चित हुनुपर्ने कुरा अत्यन्तै कुर र अमानवीय भएको बताए । उनले पछिल्लो समय देशका विभिन्न स्थानमा जातीय विभेदका घटना बढेकोले यसको घोर भत्सर्ना गर्दै न्यायको लागि र छुवाछूत अन्त्यको लागि शान्ति समाजले निरन्तर खबरदारी गरिरहेको बताए । उक्त प्लेकार्ड प्रदर्शन तथा सचेतना कार्यक्रममा मानवअधिकारकर्मी तथा पत्रकारहरूको उल्लेख्य सहभागीता रहेको थियो । मानवअधिकार तथा शान्ति समाज रूपन्देहीका सहसचिव सीता पौडेल, सचिव कृष्ण पाण्डे लगायतले बोलेका थिए ।