खोज

बुटवल, २४ असार ।    नेपाल चार्टर्ड एकाउन्टेन्टस संस्था बुटवल शाखाको आयोजनामा चार्टर्ड एकाउन्टेन्टस (सिए) अध्ययनगर्ने नयाँ विद्यार्थीहरुको लागि अभिमुखिकरण कार्यक्रम गरेको छ । बुटवलमा आयोजना गरिएको कार्यक्रममा बोल्दै नेपाल चार्टर्ड एकाउन्टेन्ट्स संस्थाका एसिष्टेन्ट डाईरेक्टर सिए गौरव खतिवडाले यो विषय अध्ययनबाट नेपालमा मात्रै अन्तराष्ट्रिय रुपमा अवसर रहेको बताए । उनले विगतका दिनहरुमा सिए अध्ययनको लागि विदेश जानुपर्ने अवस्थाको अन्त्य हुँदै नेपालमै अध्ययन सम्भाव भएको बताए ।

कार्यक्रममा सहजकर्ता समेत रहेका खतिवडाले विद्यार्थीहरु मन, बचत कर्मबाट लागेमा उच्च शिक्षामा असंभव भन्ने कुरा नरहने बताएका थिए । अभिमुखिकरण कार्यक्रममा परिक्षा समितिका संयोजक तथा बुटवल शाखा सञ्चालक सदस्य सिए रुपेश कुमार महेश्वरी, शाखा संयोजक सदस्य सिए योगेन्द्र प्रसाद बस्तोला, शाखा सञ्चालक संमन्वय समितिका सदस्य सिए बलाराम पोख्रेल, पञ्जकन्या समुहका एकाउन्ट हेड सिए सगुन खनाल, सिए रमा श्रेष्ठ लगायतले कार्यपत्र सहित विद्यार्थीहरुलाई उत्प्रेरेणामुलक सहजीकरण गरेका थिए ।

कार्यक्रम शुभारम्भ अवसरमा नेपाल चार्टर्ड एकाउन्टेन्ट्स संस्था बुटवल शाखा संयोजक सिए शिवहरी शर्माले विद्यार्थीहरुको हितका लागि नेपाल चाट्र्ड एकान्टेन्टस संस्था जहिले पनि तयार रहेको बताए ।
नेपाल चार्टर्ड एकाउन्टेन्टस संस्था बुटवल शाखा ईन्चार्ज किशोर पराजुलीका अनुसार सीए अध्ययन गर्ने विद्यार्थीहरुको थप उत्प्रेरणा सहितको कार्यक्रम गरिएको बताए । पहिला सिए अध्ययनका लागि काठमाण्डौ र भारत जानुपर्ने बाध्ययता अन्त्यसंगै अहिले बुटवलमा नै ३ वटा संस्थाले सिए अध्यापन गराईरहेका छन ।