खोज

दाङ, २३ असार ।

नेपाल परिवार नियोजन संघ दाङ शाखाको सभापतीमा भरतराज देबकोटा सर्बसम्मत चयन भएका छन् । आगामी तीन वर्षका लागि नयाँ कार्यसमिति बनेको छ ।

संघको शनिबार सम्पन्न ४४ औँ वार्षिक साधारणसभा तथा १५ औँ अधिवेशनले आगामी कार्यकालका लागि कोषाध्यक्षमा माया पोख्रेलसहित सबै कार्यसमिति निर्विरोध निर्वाचित गरेको छ ।

यसैगरी, महिला सदस्यमा बालिका लम्साल, शारदा गौतम निर्वाचित भएका छन् भने युवा सदस्यहरु कृपा सुवेदी, रेणु श्रेष्ठ, किरण पौडेल, माधा भण्डारी निर्विरोध चयन भएका छन् । ११ सदस्यीय कार्यसमितिमा रिक्त रहेको ३ जना सदस्य निर्वाचित कार्यसमितिले चयन गर्नेछ ।

संघको संशोधित विधान अनुसार उपसभापति हटाएर कोषाध्यक्ष र अरु क्षेत्रगत रुपमा सदस्य रहने गरी ११ सदस्यीय कार्यसमिति बनाईएको छ । सभापति र कोषाध्यक्ष पदको समयावधि ३ वर्षको रहेको छ भने सदस्यहरुको हकमा गोला प्रथाबाट २ र ३ वर्षे अवधि राखिएको निर्वाचन अधिकृत अधिवक्ता दीपक रेग्मीले जानकारी दिए ।

संघको विधान अनुसार, निर्वाचन प्रकृयाका लागि उम्मेदवारी माग गरिएकोमा कसैको पनि दावी विरोध नपरेपछि निर्वाचन अधिकृत रेग्मीले तोकिएको सबै पदमा निर्विरोध निर्वाचित भएको घोषणा गरेका हुन् । २०३४ सालमा स्थापित नेपाल परिवार नियोजन संघले ४६ वर्षे ईतिहासमा यौन तथा प्रजनन् स्वास्थ्यका क्षेत्रमा काम गर्दै आएको बताइएको छ ।