खोज

सुनवल, १९ असार ।

पश्चिम नवलपरासीको रामग्राम नगरपालिकालाई पुर्ण खोप सुनिश्चित तथा दिगोपना भएको पालिका घोषणा गरिएको छ । मंगलबार जिल्ला समन्वय समितिका प्रमुख तथा खोप समन्वय समितिका संयोजक भगौति यादवले नगरपालिकालाई पूर्ण खोप सुनिश्चित तथा दिगोपन भएको पालिकाको रुपमा घोषणा गरेका हुन् । जन्मेदेखि १५ महिनासम्मका बालबालिकाले सबै प्रकारको खोप पाएको आधारमा नगरपालिकालाई पूर्ण खोप सुनिश्चित भएको घोषणा गरिएको छ । कार्यक्रममा बोल्दै जिल्ला समन्वय समिति प्रमुख यादवले भौतिक पूर्वाधार मात्र नभएर नगरपालिकाले शिक्षा, स्वास्थ्य र समाजिक क्षेत्रको विकासमा पनि ध्यान दिनुपर्ने बताए । पृथ्वी चन्द्र अस्पताल लगाएतका स्वास्थ्य संस्थाको सुधारको आवश्यकता रहेकोमा यादवको जोड थियो ।

नगर प्रमुख धनपत यादवले नगरपालिका नगरबासीको स्वास्थ्यका बिषयमा गम्भीर रहेको बताउँदै १५ महिना भन्दा माथि ५९ महिना सम्मका खोप लगाउन छुटेका बालबालिकालाई पनि खोजौँ र खोपौँ अभियान चलाएर खोप प्रदान गरिएको बताए । नगरपालिकाले गाउँ गाउँबाटै सुत्केरी महिलाको भिडियो एक्सरे सहितको स्वास्थ्य परीक्षण सुरु गरेको र गभर्वती महिलालाई छ महिना पुग्ने पौष्टिक तत्व वितरण गर्देे आएको जानकारी दिए ।

कार्यक्रममा उपप्रमुख सम्झना चौधरी, प्रमुख जिल्ला अधिकारी विश्वप्रकाश अर्याल, रामग्राम १५ का वडा अध्यक्ष धनपत यादव, स्वास्थ्य कार्यालयका प्रमुख ओमप्रकाश पन्थी, पत्रकार महासंघ नवलपरासीका अध्यक्ष हरि शर्मा लगायतले बोल्दै स्वास्थ्य क्षेत्रको परिवर्तनमा तीनै तहका सरकारको भूमिका हुनुपर्नेमा जोड दिएका सुक्रौली स्वास्थ्य चौकीका ईन्चार्ज बलराम सापकोटाले जानकारी दिए ।

नगरपालिकाको १८ वटै वडामा घरधुरी सर्वेक्षण मार्फत ३४ सय १७ बालबालिकालाई खोप प्रदान गरी पुर्ण खोप सुनिश्चित गरिएको जनस्वास्थ्य निरिक्षक सुरज हरिजनले बताए । खोजि अभियानका क्रममा १५ महिना सम्मका बालबालिका मध्ये ४ जनाले खोप नलगाएको पाईएकाले उनिहरुलाई खोप प्रदान गरिएको हरिजनले जानकारी दिए ।