खोज

नवलपुर, १९ असार ।

पुर्वी नवलपरासीमा थरै परिवर्तन गरी नेपाली नागरिकता वितरण भएको पाइएको छ । नागरिकता वितरण भएको १५ वर्षपछि बल्ल घटना सार्वजनिक भएको हो । यसबारे अहिले छानविन थालिएको छ ।

जिल्लाको साविक जौवारी गाविस वडा नं. ४ हाल बुलिङटार गाउँपालिका वडा नं. ५ स्थायी घर भएका सार्की थर भएका एक ब्यक्तिलाई मगर थर बनाएर नेपाली नागरिकता दिइएपछि १५ वर्षपछि घटना सार्वजनिक भएको र पीडितले जिल्ला प्रशासन कार्यालयमा जाहेरी दिएपछि प्रहरीले एक जनालाई पक्राउ गरी छानविन थालेको जिल्ला प्रहरी कार्यालय पूुर्वी नवलपरासीले जनाएको छ ।

साविक जौवारी गाविस ४ का दिलबहादुुर सार्कीका छोरा मनबहादुर सार्कीले नक्कली बाबु खडा गरी झुक्याएर मुक्त बहादुर रानामगरको छोरा भनी तत्कालीन गाविस सचिवबाट किर्ते सिफारिस लिई २०६५ साल असार २० गते ३६–२–०१०–६१ नम्बरको नेपाली नागरिकताको प्रमाण पत्र लिएको जिल्ला प्रशासनको अभिलेखबाट देखिन आएको र सो नागरिकता तत्कालीन प्रमुख प्रशासकीय अधिकृत चिरन्जीवी सिग्देलले हस्ताक्षर गरी प्रदान गरेको अभिलेखमा भेटिएको छ ।

सार्की थर भएका निजले सर्जमीन गर्न साक्षी बस्न जौवारीबाट कावासोती सम्म ल्याउँदा गाविसको किर्ते सिफारिस गराई मगर थरबाट नागरिकता लिएपछि अहिले निजका श्रीमती, छोरा छोरी समेतले मगर थरबाट नेपाली नागरिकता लिएको जिल्ला प्रशासनले जनाएको छ ।

मगर थर कायम गरी मुक्तबहादुुर सार्कीकी श्रीमती मन्जु राना मगरले २०६६ फागुन २६ गते ३६२०१०२८५ नम्बरको नागरिकता लिएको सो नागरिकतामा प्रशासकीय अधिकृत बामदेव शर्माले हस्ताक्षर गरेको, निजकी छारीले २०७४ असार ७ गते प्रशासकीय अधिकृत कमल प्रसाद आचार्यले हस्ताक्षर गरी ३६०२७४०२००५ नम्बरको नेपाली नागरिकता जारी गरेको जिल्ला प्रशासन कार्यालयको अभिलेखबाट देखिएको कार्यालयले जनाएको छ ।

किर्ते थर नै परिवर्तन गरेर नागरिकता दिने र सिफारिस गर्ने र नागरकिता लिने विरुद्ध जिल्ला प्रशासनमा विरबहादुुर राना मगरले ठाडो उजुरी दिएपछि घटना सार्वजनिक भएको र शुरुमा प्रहरीले उजुरी लिन नमाने पनि पछि घटना वास्तविक भएको भन्दै प्रहरीले उजुरी लिएर खडक बहादुुर सार्कीलाई पक्राउ गरेको जिल्ला प्रहरी कार्यालय नवलपरासी पूर्वले जनाएको छ ।

सार्की थर नै परिवर्तन गरेर जालसाझी तरिकाले मगर थर कायम गरी नागरिकता प्रदान गर्ने जस्ता घृणित कार्यले समाजलाई कस्तो दिशाामा अगाडि बढाएको छ भन्ने कुरा अहिले उदाङ्गो भएको जौवारीका समाजसेवी मिनबहादुुर लामिछानेले बताए ।

जिल्ला प्रहरी कार्यालयका प्रमुख प्रहरी उपरीक्षक भुवनेश्वर तिवारीले कानुन बमोजिम कारबाही गर्न प्रहरी तयार रहेको बताए । तत्कालीन प्रमुख जिल्ला अधिकारी कृष्णप्रसाद लम्सालले कानुनको दायरामा ल्याउन र कारबाही थाल्न निर्देशन दिए पनि दुई महिना सम्म प्रहरीले आरोपितलाई पक्राउ नगरेको भन्दै प्रहरीको तीब्र आलोचना भएको थियो ।

अहिले प्रहरी नै अग्रसर भएपछि सो घटनामा संलग्न जो सुकैलाई पनि कारबाही गर्ने गरी प्रहरीले पक्राउ गर्न अग्रसरता देखाएको, मंगलबार एक जना पक्राउ परेको र बाँकी पनि चाँडै पक्राउ पर्ने जिल्ला प्रहरी कायार्लयले जनाएको छ ।

झुुटो, किर्ते, थरै परिवर्तन गरी नागरकिता लिनेहरु कोही विदेश पुगिसकेका छन् भने कोही फरार रहेका र खोजतलास जारी राखेको प्रहरीले जनाएको छ ।