खोज

बुटवल, १५ असार  विद्यालयस्तरमा खेल र खेलकुदको महत्व बुझाउदै ओलम्पियन सुत्र बुझाउने लक्ष्यसहित लुम्बिनी प्रदेशमा पहिलोपटक स्कुल टु ओलम्पिक कार्यक्रम गरिएको छ । प्रदेश खेलकुद परिषद लुम्बिनीको आयोजनामा अन्तरक्रिया तथा उत्प्रेरणा कार्यक्रम गरिएको हो । अन्तरक्रियामा पुर्वमन्त्री तथा ओलम्पिक सुरेन्द्र हमाल, बैकुण्ठ मानन्धर, राजेन्द्र भण्डारी, पार्वती थापा, सरस्वती चौधरी, सोनिया भट्टसंग विद्यार्थीहरुले अन्तरक्रियामा भाग लिए । विद्यार्थीहरुले कार्यक्रममा ओलम्पियनहरुसंग कुन खेल खेल्ने, कसरी मेहनत गर्ने, सफलता कसरी प्राप्त हुन्छ भन्ने विषयमा जिज्ञासा राखेका थिए ।

कार्यक्रममा सामाजिक विकासमन्त्री चन्द्रकेश गुप्ता (सिके)ले उद्घाटन गर्दै खेल र खेलाडीको विकासमा आफू निरन्तर लाग्ने प्रतिवद्घता जनाए । युवा र खेलकुद देशलाई अन्तराष्ट्रिय पहिचान दिलाउन सक्ने सम्भावना रहेको भन्दै एउटा खेललाई छनौट गरेर लाग्नुपर्ने सुझाव दिए ।
कार्यक्रममा सिद्धार्थनगर नगरपालिकाका नगरप्रमुख ईस्तियाक अहमद खाले नगरभित्र रहेका विद्यालयबाट उमेर समुहका खेलाडी पहिचान गरि प्रशिक्षण गराउने र निरन्तरता दिने गरि वातावरण बनाएको उनले बताए ।
कार्यक्रममा रुपन्देही जिल्ला प्रशासन कार्यालयका प्रमुख जिल्ला अधिकारी भरतमणी पाण्डेले नेपाली खेलकुद गतिशिल भएको दाबि गरे । कुनै बेला अभिभावक, विद्यालयबाट सहयोग नमिल्ने खेलकुदमा सबै क्षेत्र सकारात्मक रहेको बताए ।
यसैगरि प्याब्सनका केन्द्रीय उपाध्यक्ष बिष्णु पन्थीले नेपालको राष्ट्रिय खेलको हिसाबबाट हेर्दा सरकारबाट आवश्यक सोच बनाउन नसकेको दुखेसो गरे । खेलाडीहरु तनमन र धन खर्च गरे अनुसार सरकारबाट पहल नगरिएको दुखेसो गरे । विद्यालयबाट निस्केका विद्यार्थीहरुलाई संरक्षण गर्दै थप प्रशिक्षण दिन सकेमात्र देशमा खेलाडी उत्पादन हुने बताए ।
कार्यक्रममा परिषदका कोषाध्यक्ष कोशिस बहादुर खड्काले विकास, अनुसासन, गतिशीलताको नारालाई खेलाडीहरु आत्मसात गर्दै सफलता मिल्ने बताए । छिमेकी देश भारतमा खेलो ईण्डिया अभियान चलाएर ओलम्पिकमा पदक जित्ने गरि अघि बढाएको छ । लुम्बिनी प्रदेशमा पनि ‘खेल्छ लुम्बिनी प्रदेश’ नारासहित सन २०३२ मा हुने ओलम्पिकलाई लक्षित गरि कार्यक्रम लन्च गरेको बताए ।
कार्यक्रममा ओलम्पिक एशोसियन अफ नेपालका महासचिव तथा ओलम्पियन राजेन्द्र भण्डारीले ओलम्पिक एशोसियन दिपक बिष्टको नेतृत्वमा गठन गरि विद्यालयस्तरमा खेल आकर्षण बढाउने गरि कार्यक्रम चलाउने अभियान थालेको बताए । केवल सरकारतर्फमात्र दोष लगाउने प्रवृत्तिलाई अन्त्य गरि एउटा सफल ओलम्पियन बन्न मुलमन्त्र खोजी गर्ने गरि कार्यक्रम गरिएको बताए । विद्यालयस्तरमा आधारभुत खेलको ज्ञान दिनसके खेलाडी सफल बन्दै अन्तराष्ट्रिय स्तरमा लाग्न प्रेरणा मिल्ने उनले दाबी गरे ।

कार्यक्रममा पग्लिहवा माबिका ब्यवस्थापन समितिका अध्यक्ष सुशील गुरुङले विद्यालयस्तरमा खेलप्रतिको आकर्षण बुझ्न, जान्न र खेलप्रति जागरुक बनाउन कार्यक्रम महत्वपूर्ण भएको बताए । सरकारको ध्यान खेल र खेलाडीको जिविकोपार्जनमा जानुपर्ने उनले बताए । विद्यार्थीहरुलाई खेल बुझ्ने र सफल ओलम्पियन बन्ने सुत्र बुझाउने रुपमा कार्यक्रम भएको बताए ।
कार्यक्रममा परिषदका सदस्य सचिव जयप्रकाश भट्टराईले ओलम्पियनहरुको अगुवाईमा अघि बढाईएको कार्यक्रमलाई लुम्बिनी प्रदेशबाट साथ दिएको बताए । विद्यालयस्तरमा गण्डकी प्रदेशपछि लुम्बिनीबाट दोस्रो कार्यक्रम गरिएको उनले बताए । खेलाडीहरुलाई खेलको बारेमा बुझाउने, ओलम्पियनहरुको धारण बुझने, खेल छनौट गर्ने वातावरण कार्यक्रमले गर्ने उनले बताए । कार्यक्रममा रुपन्देहीका दुई दर्जन बढी सामुदायिक र नीजि विद्यालयका विद्यार्थीहरु सहभागी रहेका थिए ।