सामग्री खोज्नुहोस्

बुटवल, १४ असार  बुटवलको पहिरो प्रभावित ज्योतिनगर क्षेत्रमा वृक्षरोपण गरिएको छ। ज्योतिनगरको चेतना पासाङ टोल नजिकै जलदेवी माथिल्लो भागमा विहिबारदेखी वृक्षरोपण शुरु गरिएको हो। बुटवल उपमहानगरपालिकाका प्रमुख खेलराज पाण्डेयले वृक्षरोपणको शुरुवात गरे । सो क्षेत्रमा १ हजार ३ सय बिरुवा लगाईने उनले बताए । ज्योतिनगर क्षेत्रको पहिरो प्रभावित क्षेत्रलाई सुरक्षित बनाउनका लागि नगरबाट ग्याबिन जाली लगाउने, कल्भर्ट बनाउने, रिटेनिङ वाल लगाउने र बाढी तर्काउने काम गरेको समेत बताए । वृक्षरोपण अभियान अन्तरगत १ हजार ३ सय बाँस र अम्रिसोका विरुवा सो क्षेत्रमा रोप्ने कार्यक्रम रहेको छ। ज्योतिनगर क्षेत्रको पहिरो नियन्त्रणका लागि संघ र प्रदेश सरकारसँग आवश्यक सहकार्य गर्ने बताउँदै उनले पहिरो प्रभावित क्षेत्रका लागि विशेष कार्यक्रम सञ्चालन गर्ने बताए ।

कार्यक्रममा उपप्रमुख सावित्रादेवी अर्यालले पहिरो प्रभावित क्षेत्रका बस्ती सुरक्षित राख्नका लागि नगरबाट प्राथमिकतामा राखेर काम अघि बढाएको बताईन । नगरको बजेटबाट मात्रै पहिरो नियन्त्रण सम्भव नभएको भन्दै उनले संघ र प्रदेश सरकारको चासो जरुरी रहेको बताईन । गतवर्ष ५ सय विरुवा रोपिएको र अहिले १ हजार ३ सय विरुवा रोपेपछि पहिरो रोकथाममा सहयोग पुग्ने स्थानीय जनप्रतिनिधि अमृत खड्काले बताए । ज्योतिनगर क्षेत्र पासाङ टोल मिलन पथमा २ वर्षअघि आएको पहिरोका कारण ६ सय घर प्रभावित भएका छन्। पहिरो प्रभावित क्षेत्रमा बुटवल उपमहानगरपालिकाले पहिरो नियन्त्रणका लागि विशेष कार्यक्रम सञ्चालन गरेको छ ।