खोज

सल्यान, १३ असार ।

व्यावसायिकतातिर उन्मुख भैरहेका समुहमा आवद्ध किसानलाइ उन्नत जातका १८ जिउ भैंसी वितरण गरिएको छ । सल्यान बागचौरका भैंसीपालक कृषक समूहमा आवद्ध किसानलाइ साढे २२ लाखका १८ जिउ उन्नत भैंसी वितरण गरिएको हो । किसानलाई व्यावसायिक पशुपालनमा आकर्षित गर्दै जिल्लालाई दूध उत्पादनमा आत्मनिर्भर गराउने उद्देश्य रहेको छ ।

पशु अस्पताल तथा पशु सेवा कार्यालय सल्यान र बागचौर नगरपालिकाको आर्थिक वर्ष २०७९÷८० को वार्षिक स्वीकृत कार्यक्रम अनुसार एक स्थानीय तह एक पशु वस्तु उत्पादन कार्यक्रम अन्तर्गत वडा नं. ७ को शारदा भैंसी पालन कृषक समूहका सदस्यहरुलाई १८ वटा उन्नत जातका भैंसी हस्तान्तरण गरिएको हो । पशु अस्पताल तथा पशु सेवा कार्यालयको रु. १५ लाख, नगरपालिकाको रु. ३ लाख र स्थानियको रु. ४ लाख ४० हजार गरेर रु. २२ लाख ५० हजारमा उन्नत जातका भैँसी वितरण गरिएको नगरपालिकाले जनाएको छ ।

भैंसी वितरण गर्दै नगरप्रमुख जनकराज गौतमले किसानको आर्थिक अवस्था सुधार गर्नका लागि व्यवसायिकतामा जोड दिइएको बताए । नगर उपप्रमुख सुम्निमा डिसी वलीले आर्थिक विकासबाट नै समृद्धि हांसिल गर्न सकिने भन्दै त्यसका लागि पशु पालनलाई व्यवस्थित गर्दै यस क्षेत्रमा लगानी बढाउनुपर्ने धारणा राखिन् ।

कार्यक्रममा प्रमुख प्रशासकीय अधिकृत अनन्त कुमार गौतम, नगर प्रवक्ता दिपेश डिसी, वडा नं. ७ का वडा अध्यक्ष प्रेम बहादुर डाँगी, पशु अस्पताल तथा पशु सेवा कार्यालय सल्यानका डा. जयन्त महत, रमेश राज शर्मा लगायतले पशुपालन सम्बन्धी आवश्यक तालिम र ज्ञान अभिबृद्धी गर्न आवश्यक रहेको बताएका थिए ।