खोज

बुटवल, १२ असार ।

रुरुक्षेत्र—२, ग्वादी गुल्मीका केशव बहादुर कुँवरलाई सानैबाट खेलप्रति रुची थियो । बुबा थानेश्वर कुँवर र आमा सेती कुँवरको कोखबाट जन्मिएका उनी विद्यालयस्तरको पढाई गाउँमा नै सके । सामान्य विद्यालयको खेल गतिविधिबाहेक खेलमा आवद्ध नभएका उनी ढिलो गरी मार्शल आर्टमा लागे ।

वि.सं. २०६२ सालमा तानसेन मिलिनियम कलेजमा कक्षा ११ भर्ना हुँदा उनी खेल शुरु गरेका हुन् । जुनियर लेभलका खेलाडीहरुका बीच उनी उमेरले अलि पाका थिए । सेतो बेल्टमा धेरै मेहनत गरे । शिक्षा संकायमा भर्ना भएका उनी पढाईमा पनि उस्तै थिए । वि.सं. २०६४ मा पढाईसंगै खेलमा अब्बल रहे । कक्षा १२ सक्दै गर्दा तेक्वान्दोमा ब्लाक बेल्ट लिन सफल भए । यो अवधिमा उनले धेरै प्रतियोगितामा भाग लिए । उनको खेल जीवनको सफलताका रुपमा अन्तर्राष्ट्रिय २ पदक छन् ।

यसैगरी राष्ट्रियस्तरका एक दर्जन बढी पदक आफ्नो नाममा गराएका छन् । खेलप्रतिको लगाव र निरन्तरताकै कारण उनी अहिले मार्शल आर्ट आईटिएफमा फोर डन छन् । उनी आफुजस्तै खेलमा रुची भएका युवाहरुलाई डोजाङ खोलेर गाउँमा नै प्रशिक्षण गराउँदै आएका छन् । कोच र रेफ्रीको भूमिका समेत निर्वाह गर्दै आएका उनी धेरै खेलाडीहरुलाई खेल सिकाउदै आएका छन् । रुरु क्षेत्र २ याडुङमा श्रीअचमेश्वर तेक्वान्दो डोजाङ स्थापना गरी प्रशिक्षण दिदै आएका छन् ।

‘मेरो पालामा समयमा सिक्न पाइएन तर अहिलेका युवाहरुलाई अवसर सृजना गरेको छु’— उनले भने । सरकारबाट मार्शल आर्ट खेलमा सबैभन्दा बढी पदकको आशा गरिने भएपनि लगानी न्युन रहेको उनको तर्क छ । मार्शल आर्टसहित धेरै खेलमा निजी क्षेत्रको लगानीबाट खेलाडीहरु तयार भएको उनको दाबी छ । ‘ग्रास रुटमा सरकारले लगानी बढाउनुपर्छ’— उनले भने । सरकारले खेलाडीहरुलाई प्रोत्साहन हुने गरी कार्यक्रमहरु ल्याउनुपर्ने सुझाव दिन्छन् उनी । कम्तीमा तेक्वान्दो प्रशिक्षक स्थायी नियुक्ति दिन सके राहत मिल्ने उनको दाबी छ । निजी क्षेत्रबाट गरिएकै लगानीलाई आफ्नो नाममा प्रचार गराउने काम भएको उनी बताउँछन् ।

उनले दोस्रो दक्षिण एसियाली तेक्वान्दो प्रतियोगिता, २०११– कास्य पदक, सातौं एसियाली तेक्वान्दो प्रतियोगिता स्वर्ण पदक तथा पाँचौ राष्ट्रिय खेलकुद (२००८)– कास्य पदक, दोस्रो मनमोहन मेमोरियल राष्ट्रिय तेक्वान्दो च्याम्पियनसिप पाल्पा (२००८)– स्वर्ण पदक, पाँचौ जनरल चोई मेमोरियल तेक्वान्दो च्याम्पियनसिप, काठमाडौ (२००९) – स्वर्ण पदक, पश्चिमाञ्चल क्षेत्रीय खेलकुद प्रतियोगिता, पोखरा (२०११)– स्वर्ण पदक लगायत अन्य जिल्ला र प्रदेशस्तरीय खेलकुद प्रतियोगितामा दर्जनौं पदकहरु हासिल गरेका छन् ।

अङ्ग्रेजी विषयमा स्नातकोत्तर गरेका उनी श्री याडुङ्ग प्राथमिक बिद्यालयको शिक्षक÷खेलकुद प्रशिक्षक, श्री अचम्मेश्वर आई.टि.एफ. तेक्वान्दो डोजाङ्गका प्रमुख प्रशिक्षक, रुरुक्षेत्र गाउँपालिकाका बिद्यालयहरुमा मार्सल आर्ट प्रशिक्षण गराउँछन् । विद्यालयबाट थोरै प्रोत्साहन गर्ने काम भएको उनले बताए । यसैगरी गुल्मी जिल्ला आई.टि.एफ. बरिष्ठ उपाध्यक्ष, रुपन्देही आइ.टि.एफ.तेक्वान्दो संघका वरिष्ठ उपाध्यक्ष समेत रहेका उनी जि.के. टेक्निकल नेपाल प्रालिका संचालक, रुरु क्षेत्रमा रहेको समाजसेवा युवा क्लबका अध्यक्ष पनि हुन् । हाल गुल्मीमा १० डोजाङमा ३ सय बढी खेलाडीहरु रहेका छन् ।