खोज

रोल्पा, १० असार ।

पुर्व सभामुख कृष्णवहादुर महराले दलाल पुँजीवादी वर्ग हावी भएका कारण देशमा आर्थिक संकट चुलिएको वताएका छन् । पूर्व अर्थमन्त्री समेत रहेका नेता महराले वैक र वजार दुवैतिर अहिले पैसा नहँुदा तरलता देखिएको वताउँदै यस्तो कृत्रिम अभाव सिर्जन गर्ने दलाल पुँजीपती भएको महराले आरोप लगाए ।

“भएको पैसा दलाल पुँजीपतिहरुले वोरामा हालेर राखेका छन्”– महराले भने । यतिवेला देशमा चरम वैदेशिक हस्तक्षेप वढेको वताउँदै यस्तो वेलामा स्थानीय तहहरुले उत्पादनमा आधारित कार्यक्रम ल्याउनु पर्ने उनले वताए । “उत्पादनमा जोड दिए आत्मनिर्भरता वढ्छ, आत्मनिर्भरता वढे वैदेशिक हस्तक्षेप घट्छ त्यसकारण सवै स्थानीय तहहरुले कृषिमा लगानी गर्दै उत्पादन वढाउने र पर्यटन मार्फत पर्यटक भित्र्याउनु पर्छ”–पूर्व सभामुख महराले भने ।

रोल्पा नगरपालिकाको तेह्रौं नगर सभा उद्घाटन गर्न गृह जिल्ला रोल्पा आएका महराले यस्तो वताएका हुन । कार्यक्रममा लुम्विनी प्रदेश सभा सदस्य दीपेन्द्र पुनमगर, जिल्ला समन्वय समिति रोल्पाका प्रमुख सीता आचार्यले समेत शुभकामना दिएका थिए ।

रोल्पा नगरपालिकाको वजेट अघिल्लो वर्ष भन्दा १४ करोड कम

रोल्पा नगरपालकाले अघिल्लो वर्ष भन्दा १४ करोड २३ लाख ७० हजार कम वजेट ल्याएको छ । चालु आर्थिक वर्षका लागि ९० करोड १३ लाख ४५ हजारको वजेट ल्याएको नगरपालिकाले आगामी आर्थिक वर्षका लागि ७५ करोड ८९ लाख ७४ हजार ९९२ को वजेट ल्याएको छ । चालु तर्फ ४१ करोड १७ लाख ४५ हजारको वजेट ल्याएको उसले पुँजीगत तर्फ ३४ करोड ७१ लख ९९ हजार वजेट ल्याएको छ ।

उसले आगामी आर्थिक वर्षको वजेटले किसानहरुको जीवनस्तर उकास्ने वताएको छ । अनुदानलाई परिणाममा आधारित वनाउँदै लैजाने, मिल्क करिडोरको रुपमा विकास गर्ने, नगर चिस्यान केन्द्र स्थापना गर्ने, निःशुल्क छात्रवृत्ती कार्यक्रमलाई विषयगत विविधिकरण गर्ने वताएको छ । नगरपालिकाले अघि सारेको नीति तथा कार्यक्रममा गर्भवती आमाहरुका लागि ग्रामीण भिडियो एक्स रे कार्यक्रम, कक्षा ८ सम्म स्थानीय पाठ्यक्रम र पाठ्यपुस्तकको तयारी गर्ने उल्लेख गरेको छ । उज्यालो लिवाङ, कृषि एम्वुलेन्स व्यवस्थापन लगायतका कार्यक्रम अघि सारेको छ । जिल्लाको पर्यटन विकासका लागि पर्यटन विकास सम्मेलन आयोजना गर्ने उल्लेख गरेको छ । ओयल कम टु रोल्पा, रोल्पाको कोशेलीलाई अभियानको रुपमा संचालन गर्ने उल्लेख गरेको छ ।

मिनरल वाटर, जडिवुटी प्रशोधन, अल्लो उत्पादन, नेपाली कागज उद्योग, वास, काठ तथा हस्तकलाका सामाग्री उत्पादन गर्ने उद्योगलाई उत्पादित सामग्री, निर्यातको अवस्था र सिर्जना गरेको रोजगारीका आधारमा प्रोत्साहन गर्ने नीति अघि सारेको छ । वैदेशिक रोजगारीका क्रममा मृत्यु भएका व्यक्तिका परिवारलाई संवेदना स्वरुप आर्थिक सहायता गर्ने उल्लेख गरेको छ । नगर भित्रका विद्यालय उमेरका झण्डै ११ हजार विद्यार्थीहरुलाई वर्षमा कम्तिमा २ पटक स्वास्थ्य परीक्षणको व्यवस्था गर्ने वताएको छ । नगरपालिकाको प्रत्येक वडामा कम्तिमा एक विद्यालयलाई नमूना विद्यालयको रुपमा विकास गर्ने उल्लेख गरेको छ ।