चन्द्राैटा(कपिलवस्तु), १० असार ।
कपिलवस्तुकाे शिवराज नगरपालिकाले बर्ष २०८०/०८१ का लागि १ अर्ब २७ कराेड ८ लाख ५० हजार बजेट सार्वजनिक गरेकाे छ । नगरपालिका उपप्रमुख शिवकुमारी थारुले पालिकाकाे १३औं नगर सभाबाट नीति कार्यक्रम तथा बजेट प्रस्तुत गरेकी हुन् ।
स्थानीय समुदायमा प्रचलनमा रहेको महुवाको मदिरा पदार्थलाई व्यवसायीको सहकार्यमा ब्राण्डिङ गर्ने कार्यको लागि आवश्यक रकम विनियोजन गरेको छु,’ नगर उपप्रमुख थारुले भनिन् । नगरप्रमुख अजय थापाले भौतिक पुर्वाधारको विकासलाई निरन्तरता दिने, कृषि, स्वास्थ्य, शिक्षालाई प्राथमिकतामा राखिएको बताए । नगरलाई पूर्ण सरसफाई अभियान तथा हरियाली प्रवद्र्धन कार्यक्रमलाई विशेष प्राथमिकतामा राखिएको बताए ।
शिक्षालाई मुख्य प्राथमिकता दिने जनाउँदै कृषि अन्तर्गत सिँचाईलाई समेत कार्यक्रममा राखिएको प्रमुख थापाले दावी गरे । नगर प्रमुख थापाले स्थानीय उत्पादनलाई ब्रान्ड बनाउन सकेमा स्थानीयलाई रोजगारी सिर्जना हुने बताए । शिवराजमा महुवाबाट उत्पादन रक्सीलाई विदेश सम्म निर्यात गर्न सकेमा ठूलो उपलब्धि हासिल हुने उनले बताए ।
प्रमुख प्रशासकीय अधिकृत राकेश पाण्डेले पालिका दुई ओटा विधेयक पेश गरिएको बताए । आर्थिक विधेयक २०८० र विनियोजन विधेयक २०८० पेश गरिएको बताए । आर्थिक विधेयक अन्तर्गत ३ करोड आन्तरिक प्रक्षेपण र विनियोजन विधेयक अन्तर्गत १ अर्ब २७ करोड ८ लाख ५० हजार बजेट रहेको उनले उल्लेख गरे । यस्तै बजेटमध्ये नगर स्तरीय योजनामा ३ करोड ८५ लाख, नगर स्तरीय विविध कार्यक्रम १ करोड, वडा स्तरीय योजना ९ करोड ३५ लाख,सामाजिक विकास तर्फ ५५ लाख, प्रशासनिक तर्फ १२ करोड रकम विनियोजन गरिएको छ ।
बहुवर्षीय क्रमागत कार्यक्रम २ करोड ५३ लाख,समपूरक म्याचिङ २ करोड ६० लाख ,नगर स्तरीय पूर्वाधार विकास १ करोड बजेट विनियोजन भएको छ । शिक्षा तथा खेलकुद ८ करोड ३२ लाख,स्वास्थ्य तर्फ ३ करोड ५० लाख बजेट विनियोजन गरिएको छ । नगरले कृषि विकासमा १ करोड ,पशु विकास तर्फ ५० लाख बजेट विनियोजन गरेको छ ।
नगरपालिकाको नीति र कार्यक्रममा निःशुल्क शिक्षा सहित कृषि, पशुपालन र सरसफाइ जस्ता विषय समेटिएका छन् । शैक्षिक सुधार र पर्यटन विकासलाई पनि प्राथमिकतामा राखिएको नगरप्रमुख थापाले बताए । त्यस्तै शिवराज नगरपालिकाले चन्द्रौटा बजारलाई सौन्दर्यीकरण गर्ने भएको छ । नगरपालिकाको मुख्य बजारमा चन्द्रौटालाई व्यवस्थित बनाउनुको साथै बसपार्क निर्माण गर्ने नीति तथा कार्यक्रममा समावेश गरिएको छ ।
नगरसभाबाट नगरपालिकाले पाँच जनालाई सम्मान गरेको छ । सभाको अवसरमा ३ जना पत्रकार र २ जना कर्मचारीलाई नगद सहित सम्मान समेत गरेको छ । सम्मानित हुनेमा पत्रकार सञ्जीव गहतराज, कृष्ण गैरे र माधव बेल्वासे रहेका छन् । त्यस्तै उत्कृष्ट कर्मचारीको रूपमा प्रेम वली र वसन्त महतरालाई नगद सहित सम्मान गरिएको नगरपालिकाले जनाएको छ ।
४ पुष २०८२, शुक्रबार
