खोज

बुटवल, ९ असार ।

लुम्बिनी प्रदेश सभाको असार १० गते आईतबार बस्ने प्रदेश सभाको दोस्रो अधिबेशनको बाह्रौ बैठक स्थगित भएको छ ।

आर्थिक बर्ष २०८०÷८१ का बजेटमाथिको छलफलको लागि आव्हान गरिएको बैठक स्थगित हुनुको प्रमुख कारण सत्ता पक्ष नै देखिन्छ । स्थानीय तह वित्त हस्तान्तरण तर्फको
आयोजना तथा कार्यक्रम अर्थात सशर्त अनुदानमा सत्ता गठबन्धनको सहमति विपरितको बजेट आएको भन्दै सत्ता पक्षभित्रै चर्काे आलोचना सुरु भएको छ । भुगोल र जनसंख्याका आधारमा समान बजेट हुनुपर्नेमा मुख्यमन्त्री र अर्थमन्त्री केन्द्रित बजेट ल्याएको भन्दै विरोध सुरु भएको छ ।

बजेटमा सत्तापक्षकै असन्तुष्टी

नेपाली काङ्ग्रेसका नेतृ जमुना ढकालले अहिलेको बजेट नीतिगत निर्णय अनुसार नआएको भन्दै असन्तुष्टी व्यक्त गरेकी छिन् । लुम्बिनी सरकारको अर्थमन्त्रालले एकल शैलीमा आफु अनकुल बजेट ल्याएको भन्दै अर्थ निकाय फितलो भएको समेत दाबी गरिन । उनले भनिन्–“स्थानीय तहसँग समन्वय गरी पाठाएका सशर्त अनुदानका योजना पुरै कटौती भए । यो नसच्चिदा सम्म बजेट पास हुन सक्दैन, हाम्रा सबै योजना कटौती भए यसको जिम्मेवारी कसले लिने ? हामी ताली बजाउन र सरकारलाई समर्थन गर्न मात्रै प्रदेश सभा गएका हैनौ हाम्रो पनि जनताप्रतिको दायित्व छ ।”

सत्ता पक्षमा रहेका माओवादी केन्द्रका प्रमुख सचेतक ईन्द्रजीत थारुले अब बजेट सच्चाउन सम्भव नरहेको भन्दै बजेट संशोधनका लागि सभा स्थगित हुनु भनेको सरकारको अपरिपक्वता र गौरजिम्मेवारीपना व्यवहार रहेको बताए ।

सत्तापक्षका केही सांसद र प्रतिपक्ष दलका सांसदहरुले मुख्यमन्त्री र अर्थमन्त्री आफु केन्द्रित रहेर ल्याएको बजेट र सशर्त अनुदानको बजेट पूर्ण रुपमा सच्चाएर मात्रै बजेट पास गर्न सरकार समक्ष माग समेत गरेका छन् । यदि बजेट नसच्चिएको खण्डमा भने बजेट पास हुन नदिने दाबी समेत उनीहरुले गरेका छन् ।

प्रदेश सभाको बैठक असार १३ गते बुधबारका लागि सारिएको छ । अर्थमन्त्रीको अनुरोधमा सभामुखको निर्देशन अनुसार विशेष कारणबश बैठक स्थगित गरिएको प्रदेश सभाका सचिव दुर्लभ कुमार पुनले बताए ।