खोज

चन्द्रौटा(कपिलवस्तु), ९ असार ।

कपिलवस्तुको विजयनगर गाउँपालिकामा निर्माण भएको एक परम्परागत बाटो स्थानीयले भत्काएका छन् । पुर्व प्रदेश मन्त्री जानकी प्रसाद यादवको उपस्थितिमा बाटो भत्काइएको एक स्थानीयले बताए । लुम्बिनी प्रदेशका पुर्व उद्योग, पर्यटन तथा यातायात मन्त्री रहेका यादवको उपस्थितिमै बाटो भत्काइएको उनले बताए ।

केही व्यक्तिले मात्र राजनीतिक प्रतिशोधको भावनाले बाटो निर्माणमा अवरोध गरेको उनले बताए । अहिले आफुलाई पीडित बताउने मान्छे र स्थानीय गाउँबासीकै उपस्थितिमा समाजसेवी र केही राजनैतिक दलका प्रतिनिधिको सहमतिमै परम्परागत बाटो निर्माणमा गत वर्ष पनि सहमति भएको बताइएको छ ।

उनका अनुसार अहिले आएर अरुले उचाल्दैमा बाटो निर्माणको कार्य अवरुद्ध गर्नु गलत भएको हो । ८ वर्ष अगाडि जिल्ला विकास समितिले बनाएको बाटो उनीहरुले भत्काएका हुन् । गाउँपालिकाको वडा नम्बर ६ थानखजहनीका गान्ही यादव, पुन्ने यादव, अर्जुन यादव र नन्कु कोरीले उक्त सडक शनिबार बिहान भत्काएका हुन् । गाउँपालिकाले स्तरोन्नती गरिरहेको बाटो उनीहरुले अवरोध गर्दा बाटो निर्माणको काम रोकिएको छ ।

उनीहरुले बाटो बनाउने सहमति नै नगरी गाउँपालिकाले जबरजस्ती बाटो निर्माण गरेको आरोप लगाएका छन् । पीडित गान्ही यादवले काम गर्ने शिलशिलामा बुटवल गएको समयमा वडा अध्यक्षले हाम्रो जग्गामा बाटो निर्माण गरेको गुनासो गरे । उनीहरुले नम्बरी जग्गामा बिना सहमति बाटो निर्माणको काम भएको बताएका छन् ।

जिविसले ८ वर्ष अगाडि बनाएको बाटो गाउँपालिकाले पुनः स्तरोन्नती गर्न लागेको अवस्थामा मन्त्री यादवको बलमा उनीहरुले बाटो खनेर भत्काएका हुन् । गाउँपालिकाले ५ हात चौडाईमा सडक स्तरोन्नती गरिरहेको छ । जिविसले ८ वर्ष अगाडि चार मिटर चौडाई भएको र करिब २ सय मिटर लामो बाटो अहिले गाउँपालिकाले बनाइरहेको छ ।

जिविसले बद्दौर विद्यालयदेखि थानखजहनीको सामुदायिक भवनसम्म त्यति बेल ५ सय मिटर लामो बाटो निर्माण भएको थियोे । त्यसमा तीन सय मिटर बाटोको चौडाई आठ मिटर र दुई सय मिटरको चौडाई चार मिटर निर्माण गरिएको थियो ।

गत माघमा उनीहरुको सहमति भई उक्त सडक निर्माणको कामसमेत भएको स्थानीयले बताएका छन् । स्थानीय लाल गोपाल पंगेनी, विष्णु कुमार यादव, महाविर अहिर, राज कुमार यादव, कृष्ण मल्ल ठकुरी लगायतको उपस्थितिमा बाटो बनाउने सहमति भएको थियो ।

वडा अध्यक्ष प्रेम बहादुर कलवारले भत्काइएको बाटो परम्परागत बाटो भएको बताएका छन् । उनले स्थानीयको सहमतिमा बाटो निर्माण भएको र अहिले जनतालाई आवतजवात सहज होस् भनेर गाउँपालिकाले बाटो स्तरोन्नती गर्न लागेको बताए । बाटो निर्माणको काम नरोकी सहमति भएर अगाडि बढ्न आग्रह समेत गरेको उनले बताए । बाटो निर्माणको काममा कुनै जबरजस्ती नभएको वडा अध्यक्ष कलवारको भनाइ छ ।

जिविसले बनाएको बाटो गाउँपालिकाले पुनः स्तरोन्नती गरिरहेको अवस्था केही अराजक व्यक्तिका कारण उनीहरुले परम्परागत बाटो निर्माणको काममा अवरोध गरेको उनले बताए । यता जानकी प्रसाद यादवले गाउँपालिकाले बाटो नै नभएको ठाउँमा बाटो बनाइरहेको बताएका छन् ।

वड नं. नम्बर ६ का वडा अध्यक्ष प्रेम बहादुर कलवारले जबर्जस्ती बाटो बनाएको आरोप लगाए । पीडितले गुनासो गरेपछि स्वयं बाटो किन भत्काइएको हो ? कारण बुझ्न पुगेको उनले दावी गरे । नक्सामा बाटो नभएको बताउँदै सबैले सहमति अनुसार बाटो निर्माणको कार्य अघि बढाउन सुझावसमेत दिएको जिकिर गरे ।

गाउँपालिका अध्यक्ष गोपाल बहादुर थापाले आरटिओ र हुलाकी मार्गसँग बताउँदै उक्त सडक हुँदै बद्दौर गाउँ र थानखजहनी गाउँ पुगिने सहायक मुख्य बाटो भएको बताए । आधारभूत स्वास्थ्य चौकी, सामुदायिक भवन खजहनी, जनजागृति विद्यालय जाने सडक पनि सो सडकसँगै जोडिएकोले गाउँपालिकाले स्तरोन्नतीका लागि बजेट छुट्याएर काम गरेको उनले बताए । यसरी पुरै सडक नै भत्काएर विकासमा अवरोध गर्नु गलत भएको अध्यक्ष थापाको भनाइ छ ।